Este martes deu comezo a talla dos máis de 300 eucaliptos que se atopan espallados por todo o terreo da finca do castelo de Soutomaior.
Trátase de arredor de 333 árbores que, ata hoxe, estaban localizadas nas máis de 25 hectáreas de explotación forestal que integran o complexo, e cuxa retirada foi aprobada polo goberno provincial por razóns de protección medioambiental e beleza paisaxística.
Para o comezo dos traballos foi preciso que o solo onde se atopan as árbores estivese moi seco, razón que fixo necesario ter que agardar a que o bo tempo se prolongase durante varios días. De xeito contrario, a maquinaria tería labrado moito os terreos e iso levaría consigo consecuencias negativas para o solo.
A partir deste momento a empresa adxudicataria (Díaz y Buceta, S.L., que ofreceu un importe de 34,24 euros por tonelada de madeira) terá un prazo de, como máximo, dúas semanas para proceder á tala de todos os exemplares de eucalipto da finca.
A empresa poderá aproveitar todas as pezas resultantes da tala cun diámetro igual ou superior aos sete centímetros e, aquelas que non cheguen a estas medidas, serán destinadas á elaboración de compostaxe.