A corporación municipal de Bueu celebraba a sesión plenaria de maio na que se aprobaba unha moción do grupo ACB-SON sobre a defensa da biodiversidade dos montes galegos e a paralización das plantacións de eucaliptos.
A moción pedía a inscrición do eucalipto no Catálogo de Especies Exóticas e Invasoras do Estado, ademais de paralizar novas plantacións, eliminar esta especie de espazos sensibles ou instar as administracións a que se doten de orzamento destinado a conceder axudas para o cumprimento destas medidas.
A moción contou co apoio do propio grupo que a presentaba, ademais do BNG e do PSOE.
A segunda moción que se debatía no pleno deste martes referíase á apertura de diálogo entre o parque de maquinaria e a Deputación provincial. A proposta foi presentada tamén polo portavoz de ACB-SON e apelaba á resolución do conflito cos traballadores.
O concelleiro de novas tecnoloxías e deputado de Cultura, Xosé Leal, interveu sinalando que non existe ese conflito e que todo se reduce a unha regularización dunha situación ilegal dunha parte destes traballadores. Insistiu en que o diálogo nunca chegou a pecharse e que se levaron a cabo varias negociacións.
A moción só contou cos votos favorables de ACB-SON. BNG e PSOE, que forman cogobierno na institución provincial, votaron en contra, mentres que o PP abstívose.
No pleno tratouse tamén unha comunicación da alcaldía relativa á toma de razón anticipada ao cargo de Ramón Cerviño, que será nomeado concelleiro do PP, tras a dimisión de Berta Pérez.