O grupo de goberno do Concello de Cerdedo-Cotobade vai presentar ante o pleno deste mércores a organización do novo municipio.
É unha proposta de funcionamento transitoria e provisional que se centrará na prórroga das consignacións contempladas nos respectivos orzamentos municipais ata que comece a prometida reducción de gastos coa aprobación dos orzamentos 2017.
A proposta do executivo inclúe o nomeamento de José Balseiros, ex alcalde de Cerdedo, como vicepresidente primeiro, mentres que o cotobadés Fernando Vázquez e a cerdedense Enma Valiñas ocuparán as vicepresidencias segunda e terceira, respectivamente.
No ámbito salarial, vanse manter as dúas adicacións exclusivas que tiñan Jorge Cubela (35.000 euros brutos anuais) e José Balseiros (40.000) para respectar o aprobado polos orzamentos de cada municipio. Dita situación reformularase en base ás accións de aforro en soldos e persoal que se proxectan coa fusión e que comezarán a ser efectivas ao longo do ano 2017 coa primeira previsión de contas conxunta.
O máximo órgano de Cerdedo-Cotobade serán os plenos da xunta xestora, que se celebrarán de xeito ordinario cada dous meses nas citas impares do calendario (xaneiro, marzo, maio, xullo, setembro e novembro). As sesións serán os derradeiros xoves dos mencionados meses ás 12.00 horas.
De xeito previo a estas convocatorias ou cando ocasionalmente houbera temas de interese, convocaranse as comisións informativas, que contarán con sete membros, cinco do grupo popular e dous do grupo socialista para respectar a proporcionalidade existente na xunta xestora.
Haberá un total de catro comisións, que se celebrarán os luns previos a cada pleno ás 12.00 horas e que serán as seguintes: Urbanismo e Obras; Facenda, Contas e Promoción Económica, que actuará como Comisión Especial de Contas; Medio Ambiente, Medio Rural, Cultura, Patrimonio e Interior; e Asuntos do Pleno, Servizos Sociais, Educación e Deporte.
Por outra banda, tamén terá poder executivo a xunta de goberno local, que estará conformada por sete membros: Jorge Cubela como presidente, e seis vogais, dos que tres serán de Cotobade e outros tantos de Cerdedo. O executivo só incluirá sete membros tanto na xunta de goberno como nas comisións cando podería elevar a cifra ata nove ou once para repartir máis a carga de traballo das mesmas, pero prefire contar con menos compoñentes en aras do aforro e a reducción de custes.
En canto ás asignacións por asistencia a órganos colexiados, a proposta do grupo de goberno recolle 80 euros por cada pleno, 190 euros por cada sesión da xunta de goberno local, 190 por presidencia de comisión informativa e 80 pola asistencia de cada vogal. Así mesmo, as dotacións económicas para os grupos municipais fíxanse en 15 euros mensuais por cada partido político e outros 15 euros mensuais por cada un dos vogais que posúan na xunta xestora.
Engade Pontevedra Viva como fonte preferida de Google de balde
Mantente informado coas últimas noticias de actualidade.