Os hostaleiros de Cuntis recibirán unha axuda para paliar as consecuencias da pandemia.
En concreto trátase dunha achega ao sector servizos de fondos municipais pero canalizados a través da Xunta de Galicia para outorgar unha maior seguridade xurídica e axilidade burocrática, sinala o goberno local.
En total serán 23 os hostaleiros que poderán acceder a unha axuda de 1.000 euros.
Esta actuación entra dentro do convenio de colaboración entre a Xunta e o Concello para a adhesión ao sistema de concesión de axudas directas ao sector da hostalería cuxos negocios se viron afectados por peches de actividade ditados polas autoridades sanitarias por mor da covid-19.
A recepción desta partida únese a outras medidas adoptadas pola administración local para colaborar cun dos sectores máis afectados pola pandemia, entre as que tamén destaca a supresión das taxas pola instalación de terrazas ou pola recollida de lixo.