A alcaldesa de Marín, María Ramallo, recibiu este venres no Salón de Plenos do Concello á nova promoción de novo alumnado que inicia este setembro a súa traxectoria académica, para converterse nos futuros oficiais e enxeñeiros da Armada.
En total, son 110 rapaces que xa fixeron, tal e como destacou a rexedora, "un gran esforzo para chegar até aquí, xa que tivestes que superar unha nota de corte moi elevada, o que supón unha implicación coas vosas obligacións académicas admirables". "Estes días", dirixiuse Ramallo aos estudantes, "son moi intensos, de moitos cambios e de poder poñer ese primeiro pé na vosa nova vida, que xa cambiou para sempre".
Ademais, este ano é especial para os lazos de Marín coa Escola Naval, xa que se cumpren 80 anos desde que o centro castrense está na vila. "Hoxe é como a nosa Universidade, o noso campus que nos sitúa no mapa e que para vós será un lugar ao que seguro sempre volveredes para lembrar esta época tan bonita e especial da vosa formación", explicou a alcaldesa.
Ramallo tamén quixo ter unhas palabras de recoñecemento "a todas as mulleres que formades parte desta promoción", porque "aínda que cada vez sodes máis, aínda queda camiño por percorrer".
O acto rematou coa tradicional foto de familia nas escaleiras de entrada ao edificio consistorial.