Un grupo de representantes sindicais e membros do comité de empresa de Viaqua tiñan previsto concentrarse ante a sede desta empresa en Pontevedra na rúa Padre Luis. Alí encontrábase un coche da Policía Nacional para evitar incidencias. Pero os traballadores, convocados por CIG e CC.OO., decidiron realizar o acto de protesta na praza da Peregrina, afastados da sede.
Alí manifestaron o seu malestar contra a empresa concesionaria do servizo de augas de Pontevedra debido a que a dirección intenta empeorar as condicións do convenio que se está a negociar para toda Galicia.
Viaqua, antes coñecida como Aquagest, conta con 500 empregados na comunidade, en Pontevedra a cifra alcanza os 85 e os representantes sindicais denuncian que, nos últimos tempos, se reduciu o persoal, mesmo cun despedimento no concello capitalino.
Dende o comité de empresa apuntan que a dirección xustifica os recortes que queren aplicar no novo convenio debido á crise económica. Non obstante, dende os sindicatos indican que os datos de Viaqua non xustifican a intención da empresa de eliminar a antigüidade e os plus, despois da conxelación salarial que sofren dende 2013.
Por este motivo, reclaman o Concello de Pontevedra que defenda os traballadores e que prema á entidade: "A empresa xestiona este servizo público. Os traballadores somos os que máis estamos mirando para este servizo e a empresa está tentando evitar que ofrezamos un servizo público de calidade", indicaba Francisco Ayaso, membro do comité.
O persoal de Viaqua en Pontevedra está formado por traballadores cunha media de idade que rolda os 40 anos e contan cunha antigüidade que se sitúa entre 15 e 20 anos.