Ovos benedictinos con bonito do norte Pescamar

Poio
25 de xaneiro 2025
Actualizado: 03 de abril

Un prato imprescindible para gozar na hora do brunch, o refrixerio que se toma por influencia anglosaxoa entre a hora do almorzo e a comida

Ovos Benedict
Ovos Benedict / Foto de Anton Rysak en Vecteezy

Adentrámonos nunha nova entrega de "A cociña gourmet en conserva", coa calidade de sempre de Conservas Pescamar e un prato imprescindible no brunch, o refrixerio que se toma por influencia anglosaxoa entre a hora do almorzo e a comida.

O bonito é un peixe azul rico en graxa saudable, xa que contén unha gran cantidade de ácidos graxos poliinsaturados. A esta calidade, hai que engadir os beneficios da súa presentación en aceite de oliva.

Bonito do Norte en aceite de oliva Pescamar
Bonito do Norte en aceite de oliva PescamarConservas Pescamar

A orixe dos ovos benedictinos ou Benedict é incerta. Dende que toman o nome por Lemuel Benedict, un corredor de bolsa retirado que pediu un ovo escalfado acompañado, entre outros, de salsa holandesa, no Hotel Waldorf de Nova York; ata quen o atribúe ao matrimonio Benedict, que a finais do século XIX adoitaba almorzar este prato no restaurante neoyorkino Delmonico's; pasando mesmo por unha atribución ao Papa Benedito XIII.

Para preparar un delicioso brunch de Ovos benedictinos con bonito do norte Pescamarnecesitamos os seguintes ingredientes (para 2 comensais):

- 1 lata de bonito do norte en aceite de oliva Pescamar

- 2 ovos

- papel filme

- 100 g de salmón

- 1 bolo de pan redondo

- aneto

Para a salsa holandesa:

- 2 xemas de ovo a temperatura ambiente

- 125 gramos de manteiga

- 1 cucharada de zume de limón

- Sal

- Pementa

Preparación:

Para elaborar a salsa holandesa, primeiro temos que clarificar a manteiga. Para iso, derretémola a lume lento nun cazo, coidando de que non chegue a ferver. Sen remover, esperamos a que se separen a graxa e o soro do leite. Cun coador retiramos os residuos brancos que flotan (soro lácteo) e quedámonos só coa graxa clarificada.

Nun bol batemos as xemas de ovo. Aos poucos, incorporamos a manteiga clarificada e emulsionamos cunha variña ata lograr unha textura cremosa. Engadimos o zume de limón e salpementamos.

Para a preparación dos ovos escalfados estendemos nunha cunca un anaco de papel de filme, engraxamos cun pouco do aceite de oliva da lata, cascamos un ovo e colocámolo enriba. Unimos o filme polas puntas formando un saquiño co ovo dentro. Dámoslle unhas voltas aos extremos do filme con coidado para que quede ben pecho e sen aire no seu interior, e atamos cun fío groso de cociña para asegurar. Procedemos da mesma maneira co segundo ovo.

Nun cazo, poñemos auga abundante e levámola a ebulición. Cando estea a ferver, introducimos os saquiños cos ovos e cocemos durante 4 minutos. A continuación, retirámolos da auga quente e introducímolos en auga moi fría para que non se acabe de cocer a xema e quede líquida. Tras uns minutos, abrimos o filme e separámolo de cada ovo.

Procedemos á montaxe do prato. Para iso, abrimos o bolo e tostamos cada metade. Sobre cada metade, repartimos a lata de bonito do norte en aceite de oliva Pescamar, unha porción de salmón cun pouco de aneto por riba, o ovo escalfado e a salsa holandesa.

En dúas semanas, os produtos do mar serán de novo protagonistas dunha nova receita de "A cociña gourmet en conserva" de Conservas Pescamar.

Huevos Benedict
Ovos BenedictFoto de mrsiraphol en Freepik