A área sanitaria de Pontevedra-O Salnés recibía unha carta de recoñecemento e agradecemento dunha paciente en tratamento oncolóxico no Hospital Provincial de Pontevedra.
A misiva, escrita a man pola propia usuaria, vai dirixida ao persoal de enfermaría e auxiliares do departamento de Oncoloxía, salientando tanto a atención profesional como a calidade humana e o acompañamento nun proceso vital especialmente delicado.
No texto, a paciente relata como, nun momento de gran vulnerabilidade, atopou no equipo asistencial un apoio básico e fundamental, alén do coidado sanitario.
Sinala o valor do acompañamento emocional, a escoita activa e os xestos cotiáns de afecto, destacando o papel que xogaron "cada mirada atenta", "cada palabra suave" e "cada xesto cheo de paciencia" no seu benestar durante o tratamento.
A actitude do persoal, mesmo nos momentos máis duros do proceso, é presentada pola paciente como un estímulo para afrontar a situación, subliñando que "un sorriso pode levantar o ánimo nos días máis pesados" e que a proximidade humana axuda a soportar mellor a dor.
Nun dos fragmentos máis destacados, a paciente reflicte sobre o significado da verdadeira fortaleza na atención sanitaria, vinculándoa á tenrura, á capacidade de escoitar sen présa e á presenza constante dos profesionais, sen buscar nada a cambio.
"Grazas por ser a luz nun camiño incerto", sinala a muller no escrito.
A carta conclúe cun agradecemento explícito ao equipo de Oncoloxía do Hospital Provincial de Pontevedra polo seu labor e humanidade, afirmando levar consigo "un profundo respecto, unha gratitude inmensa e o recordo de persoas que transforman a dor con bondade".