Este venres 27 e sábado 28 de marzo sitúanse os postos de venda de palmas e poliñas de oliveira para o Domingo de Ramos, fronte ao Mercado de Abastos. Ademais, no interior tamén se poden atopar algunhas palmas á venda en postos habituais.
Os prezos das palmas oscilan entre os 2.50 e 3 euros, as máis pequenas, e os 15 euros, as lisas para adultos, que aumentaron con respecto ao ano pasado. Os clientes adquiren unha gran variedade de tamaños, sen haber un tipo de exemplar que destaque por riba do resto.
As poliñas de oliveira tamén se poden atopar a prezos desde 50 céntimos até dous ou tres euros.
Os vendedores móstranse optimistas ante a afluencia que está a ter este mercado, esperando que durante o sábado asistan máis persoas a comprar. Tamén contan con que o bo tempo inflúa na venda.
Doutra banda, afirman que a baixada da demanda non se debe á venda das palmas en supermercados, senón na perda da tradición xa que "cada vez hai menos nenos que participen". De feito, nos outros establecementos véndense máis caras, segundo indica unha das vendedoras.
Algunhas traballadoras destacan a importancia de valorar o tradicional, contando que os centros comerciais que ofrecen as palmas non as traballan, ao contrario que os postos, que levan a cabo un proceso de elaboración.
Hai uns 20 anos, aproximadamente o tempo que algunhas traballadoras levan vendéndoas, a acollida era moito maior. Sinalan que se nota un gran cambio na implicación nas procesións, sobre todo da poboación máis nova.
Engade Pontevedra Viva como fonte preferida de Google de balde
Mantente informado coas últimas noticias de actualidade.