O Concello de Sanxenxo anunciou que só permitirá a celebración de fogueiras de San Xoán en tres praias do municipio: Panadeira, Silgar e Caneliñas.
A medida, que busca compatibilizar a tradicional celebración coa seguridade e o coidado da contorna, prohibe expresamente acender lume en calquera outro areal da localidade turística.
As persoas interesadas en organizar unha fogueira, tanto nestas praias como en leiras particulares ou prazas públicas, deberán solicitar autorización previa.
O prazo para presentar as solicitudes abrirase o luns 9 de xuño e permanecerá vixente ata o venres 20 de xuño ás 14:00 horas.
Para facilitar o trámite, ademais do rexistro municipal (tanto electrónico como presencial), o Concello habilitará de forma excepcional as oficinas de Medio Ambiente en Vilalonga, onde se poderán xestionar as comunicacións previas tanto para San Xoán como para San Pedro.
Unha vez completado o procedemento, os responsables deberán asinar un documento comprometéndose a cumprir a normativa establecida.
O dispositivo especial para a noite do 23 de xuño incluirá un reforzo da Policía Local, servizos de emerxencia e limpeza.
PROHBICIÓN DE BAÑO
As fogueiras estarán permitidas desde as 22:00 horas ata as 6:00 da mañá seguinte, período durante o cal quedará prohibido o baño. Os participantes poderán comezar a baixar o material á praia a partir das 21:00 horas, e deberán abandonar os areais ás 6:00 para que os servizos municipais poidan acometer os labores de limpeza.
Entre as medidas de seguridade adoptadas, destaca a prohibición de tendas de campaña e faroliños tailandeses, así como a instalación de valos para delimitar os espazos autorizados e bidóns para a recollida de cinzas. Só se permite queimar leña limpa, quedando terminantemente prohibido o uso de materiais plásticos, madeiras pintadas ou con cravos.
Tampouco se poderán levar botellas ou vasos de vidro á praia, nin reproducir música cun volume que poida molestar ás zonas residenciais.
Para as fogueiras de San Pedro, o Concello manterá aberto o prazo de solicitudes ata o 26 de xuño ás 14:00 horas, aplicando un dispositivo similar durante a noite do 28 ao 29 de xuño.
A Concellaría de Medio Ambiente elaborará unha listaxe cos participantes e localizacións autorizadas que será entregado á Policía Local e Emerxencias de Sanxenxo para coordinar a vixilancia e control durante ambas as celebracións.