O Centro Comercial Urbano (CCU) Zona Monumental prepara para o vindeiro mércores 24 de decembro unha cita moi especial pensada para gozar en familia: a "Recepción de Papá Noel e obradoiros infantís".
Papá Noel chega con maxia ao corazón de Pontevedra entre as 12.00 e as 14.00 horas no primeiro andar do Mercado de Abastos.
Durante a mañá, Santa Claus instalarase neste emblemático espazo para recibir aos nenos e nenas que queiran entregarlle en persoa as súas cartas, nun ambiente cheo de ilusión, sorrisos e espírito nadalicio.
A visita completarase cun obradoiro infantil de Nadal, deseñado para estimular a creatividade dos máis pequenos e convidalos a participar activamente nesta celebración tan especial.
A actividade será totalmente gratuíta, aínda que para acceder será necesario presentar un ticket de compra dun comercio asociado ao CCU Zona Monumental.
Esta iniciativa busca apoiar e dinamizar o comercio local nunha das épocas máis importantes do ano.
Esta proposta forma parte do programa de dinamización comercial do CCU Zona Monumental, co obxectivo de atraer público ao centro urbano, impulsar a actividade económica e ofrecer alternativas de lecer para toda a familia.
A iniciativa está organizada polo CCU Zona Monumental e conta coa cofinanciación da Xunta de Galicia, reforzando así o compromiso co comercio de proximidade e coa vida social da cidade.