Os xogos de auga situados no parque de Rosalía de Castro atópanse xa operativos desde o pasado venres 19 de xuño, coincidindo co remate do curso escolar e coa chegada das primeiras xornadas de calor propias da tempada estival.
A instalación constitúe unha boa alternativa de lecer ao aire libre para a infancia durante os meses de verán.
O recinto permanecerá aberto todos os días nun horario continuado de 10.00 a 22.00 horas, permitindo ás familias desfrutar dun espazo pensado para combater as altas temperaturas mediante actividades acuáticas seguras e accesibles.
Entre os elementos cos que conta a infraestrutura figuran diferentes xogos de auga, como canóns con capacidade de xiro completo, arcos que xeran finas néboas refrescantes e diversos dispositivos con chorros dinámicos e efectos acuáticos destinados ao entretemento dos usuarios máis novos.
Porén, durante a primeira fin de semana de funcionamento rexistrouse algunha incidencia puntual. A máis destacada produciuse este sábado arredor das 18.30 horas, cando os xogos de auga deixaron de funcionar temporalmente, o que provocou as queixas de varias familias que se atopaban no recinto.
Algúns usuarios apuntaron como posible causa a que nese momento se estaba a desmontar a pulpería instalada no mercadiño próximo e que os labores de limpeza, realizados con conexión á rede de abastecemento, poderían afectar á presión ou á subministración de auga do parque infantil. En todo caso, esta circunstancia non foi confirmada oficialmente.
Dende o Concello de Pontevedra lembran que o sistema funciona mediante un circuíto pechado que reutiliza a auga tras someterse a un proceso automático de depuración, evitando así o desperdicio de recursos hídricos.
Ademais, dispón dun mecanismo de filtrado e dun control permanente da calidade da auga que supervisa parámetros como o nivel de cloro e o pH. No caso de detectarse algunha anomalía, o abastecemento interromperíase automaticamente ata recuperar os valores establecidos.
Desde o punto de vista da seguridade, os xogos foron fabricados conforme á normativa europea vixente para áreas recreativas infantís. Para a súa construción empregáronse materiais resistentes e de longa duración, como aceiro inoxidable e cobre, incorporando tamén sistemas de protección específicos e elementos antivandálicos que contribúen a garantir un uso seguro das instalacións.