Sorrisos, agradecementos, abrazos e bicos. Eses foron os protagonistas da firma do convenio entre a consellería de Educación e o Concello de Pontevedra para que os escolares do Colexio de Barcelos poidan utilizar as instalacións da praza durante o horario lectivo.
"Só falta un chupito", afirmaba o xefe territorial de Educación, César Pérez Ares, mentres lle pedía un bico á concelleira Carmen Fouces tentando esquivar ao alcalde Miguel Anxo Fernández Lores, que se atopaba entre ambos, preparados para asinar o acordo que corresponsabiliza ás dúas institucións ante calquera dano que poidan sufrir os escolares na zona que se cede na praza de Barcelos.
Presentes na firma atopábanse representantes da ANPA e o director do centro, Anxo Luís Rodríguez Braga, quen afirmou que agora van comunicar este acordo ao Consello escolar e a planificar a utilización destas instalacións da praza para que, en breve, todo o alumnado poida gozar deste espazo. Asegura que os máis beneficiados por este acordo serán os alumnos de infantil. Ademais apuntou que se vai a desafogar o horario de recreo no que os 400 estudantes do centro repartíanse polas distintas instalacións interiores do edificio.
Sonia Canay, representante da ANPA, afirmaba que a idea que xurdira a través dunha idea inicial dos escolares fíxose realidade grazas ao acordo entre as administracións. Aqueles estudantes, artífices da idea orixinal, atópanse xa en sexto "pero, polo menos, terán un curso para gozar", apuntou Canay.
En este mesmo sentido pronunciouse César Pérez Ares. O xefe territorial de Educación sinalou que este convenio reflicte unha fórmula de optimizar recursos e engadiu que o centro contou cun recente investimento de 50.000 euros con melloras no ximnasio e en distintos espazos interiores.
Carmen Fouces indicou que este traballo realizouse en colaboración co concelleiro de Mobilidade, Luís Bará, e que mostraba unha democratización de espazo público.
Pola súa banda, Miguel Anxo Fernández Lores destacou que todo este proxecto xurdira dunha proposta realizada por nenos e que tentarán premialos a través dun acto no que reciban un diploma pola súa achega.
O venres 28 de outubro, a ANPA ten previsto levar a cabo un magosto na contorna escolar e as representantes do colectivo e a dirección do centro sinalaron que sería unha boa data para que este convenio se fixese efectivo.