O Pleno aproba as obras para frear as inundacións e a actuación en Pasarón

O Concello de Pontevedra celebrou este luns 16 de febreiro a sesión plenaria na Casa Consistorial, na que se debateron unha serie de medidas, na súa maioría urbanísticas, acompañadas dalgún que outro momento tenso e de confrontación.

Un dos principais acordos foi a aprobación por maioría da proposta lanzada polo portavoz do Partido Popular, Rafa Domínguez, para realizar obras na rede de sumidoiros da rúa Fernando Olmedo e na contorna do Santo, nos Praceres, dous puntos críticos da cidade nos que son recorrentes as inundacións.

A iniciativa saíu adiante cos votos favorables do PP e do Partido Socialista, e os votos en contra do BNG, ao que acusan de non dar resposta a esta "situación complexa que este ano se ve semana tras semana".

O concelleiro de Obras e Infraestruturas, César Mosquera, defendeu que " por riba de todo está solucionar os problemas", aínda que advertiu da dificultade técnica de ambas as dúas actuacións. No caso de Fernando Olmedo, o problema é que o río está desviado da canle orixinal e "habería que levantar o CGTD", mentres que a zona do Santo está afectada pola sentenza do Tribunal Supremo sobre o tren ao porto de Marín. A pesar diso, Mosquera mostrouse "optimista" e confiou en que "a solución definitiva estea bastante próxima".

O Pleno aprobou por unanimidade a proposta do Partido Popular de recuperar o circuíto de carreiras en Pontevedra, un espazo que, segundo o edil popular Guille Juncal, serviría para fomentar a actividade física nos pontevedreses e "estender as probas deportivas a parroquias e barrios".

A concelleira de Deportes, Anabel Gulías, subliñou que esta medida daría "máis publicidade e visibilidade" á cidade, mentres que o socialista Manuel Fariña lembrou que clubs como a Sociedad Gimnástica ou o Atletismo Rías Baixas xa reclamaran esta iniciativa. Suxeriu "revisar entre todos as rutas saudables e dinamizalas" ao considerar necseario contar con percorridos sinalizados con diferentes distancias, dificultades e niveis.

Tamén por unanimidade, a Corporación municipal deu luz verde á petición do PSOE para actuar no Estadio Municipal de Pasarón e arranxar a "chapuza" que fixo a Deputación gobernada polo PP. Os socialistas calculan que a actuación tería un custo de até medio millón de euros e propoñen solicitar axuda económica tanto á Xunta de Galicia como á Deputación de Pontevedra.

No caso do portavoz popular, Rafa Domínguez, insistiu en que "la Deputación tiene que estar" na actuación e ten que "ayudar a resolver el problema".

Outro punto que tivo o consenso do tres grupos foi a moción do Partido Popular para dotar a Pontevedra dun parque infantil cuberto para que os nenos e nenas pontevedreses poidan xogar os 365 días do ano, independientementemente das condicións meteorolóxicas.

A concelleira popular Raquel Martínez defendeu a necesidade deste equipamento, que tanto PSOE como BNG cualificaron como "necesario". É, ademais, "unha das necesidades pendentes en canto a áreas de xogo na cidade", tal e como apuntou Iván Puentes.

Pola súa banda, o concelleiro de Servizos Urbanos Básicos, Xaquín Moreda, cualificou a proposta de "construtiva", pero advertiu de que este tipo de instalación require un estudo técnico previo e que colocar unha cuberta nun parque xa existente "é moi difícil", polo que a opción máis viable sería "facer un novo que se adapte á localización".

Tamén se aprobou, co apoio de BNG e o PSOE e a abstención do PP, a solicitude do goberno local á Xunta de Galicia de anular a resolución aprobada o pasado 25 de novembro de 2025 pola Dirección Xeral de Enerxías Renovables e Cambio Climático, pola que se concede a autorización administrativa previa para a construción do parque eólico da Serra da Fracha.

O edil de Urbanismo, Alberto Oubiña, advertiu de que o proxecto "afecta a unha das actuacións xa realizadas na Fracha e na que están implicadas as comunidades de Marcón, Canicouva e Tomeza" e denunciou que durante a tramitación "se cometeron infraccións nos trámites administrativos".

Finalmente, o Pleno debateu sobre a proposta do Partido Socialista de comprar o Cine Gónviz e convertelo nun centro cultural, co fin de evitar a súa desaparición.

Puentes defendeu que o Concello "ten que intervir para salvar o Gónviz e tratar de adquirilo competindo libremente". O PSOE expón contactar co propietario do cine e "facer o esforzo para evitar que se execute a obra" e se converta nunha clínica sanitaria "que pode estar en calquera outro lado".

Para o BNG esta proposta ten "dificultades urbanísticas que complican que se poida converter non que se propón", especialmente pola imposibilidade de habilitar unha saída de emerxencia directa á rúa. "Non existe capacidade urbanística para facelo. Non é o mesmo unha saída de emerxencia para 100 persoas que para as centos que abarcaría o centro. Temos que ser serios, xestionamos fondos públicos e temos que ser respectuosos", sinalou.

O grupo popular, pola súa banda, cualificou a iniciativa de "ocurrencia" e cuestionou o momento elixido para expola. Dominguez aclarou que "no nos oponemos", pero considerou que "sin saber el precio, sin saber temas jurídicos, legales y arquitectónicos, es difícil posicionarse".

Finalmente, a proposta socialista foi aprobada por maioría simple ao contar unicamente cos votos a favor do PSOE e a abstención de BNG e PP.