A sesión plenaria celebrada este luns 23 de marzo no Concello de Pontevedra estivo marcada pola aprobación definitiva dos orzamentos para este 2026 e un alto grao de acordo en materia social, malia os recorrentes desencontros entre o goberno e a oposición na xestión do patrimonio e o mantemento urbano.
O pleno desenvolveuse coa ausencia dos concelleiros Xaquín Moreda (BNG) e Martín Martínez (PP), e coa lectura inicial dun manifesto feminista por parte de dúas alumnas do IES Frei Martín Sarmiento, con motivo do 8M.
Sara Asdih Ouerdi e Aalia Estévez González, representantes do Consello Municipal da Muller Nova, foron as encargadas da lectura. No seu manifesto, as estudantes lembraron que a igualdade non se mide só polas leis, senón "polas cousas das que ninguén fala ou que temos normalizadas".
"Non queremos volver pedir permiso, volver calar ante as inxustizas ou volver renunciar aos soños para vivir os que a sociedade ten preparados para nós", sentenciaron as mozas antes os representantes municipais no salón de plenos.
ORZAMENTOS
O punto central da xornada foi a aprobación definitiva do orzamento xeral do Concello para 2026, que ascende a máis de 103 millóns de euros, a cifra máis alta da historia da administración local. O concelleiro de Facenda, Raimundo González (BNG), explicou que se desestimou a única reclamación presentada por Vox.
González destacou que estas contas permitirán "actuacións en proxectos como o río Gafos, a renovación lumínica e a praza de Monte Porreiro", entre outros proxectos.
Pola súa banda, Rafa Domínguez (PP) xustificou o seu voto en contra non polos informes dos funcionarios, senón por considerar que son "malos orzamentos" e que chegan con atraso. "O Concello perdeu case tres meses para aprobar estas contas", sinalou o líder popular.
Desde o público, o representante de Vox en Pontevedra, Manuel Torres, interrompeu a sesión cualificando as contas de "estafa" e "inviables".
Finalmente, a aprobación definitiva do orzamento saíu adiante cos 13 votos a favor de BNG e PSOE fronte aos 10 en contra do PP.
FUTURO DO CITA
A reapertura do Centro de Interpretación das Torres Arcebispais (CITA), pechado desde hai máis dun ano por problemas de gas radon e ventilación, centrou un dos debates máis acesos. O PP presentou unha moción para a súa reapertura inmediata, criticando o que consideran unha "pésima xestión".
Rafa Domínguez (PP) afeou ao goberno que o único museo municipal estea clausurado: "Nace con Lores, malvive con Lores e morre con Lores".
Domínguez manifestou estar sorprendido pola proposta do BNG sinalando que o CITA pase á Deputación de Pontevedra. O portavoz popular, que tamén é vicepresidente provincial, respondeu con ironía: "O que din é que Lores non sabe xestionalo e pídeme que o xestione eu".
Desde o PSOE, Iván Puentes replicou que o PP "perdeu tres millóns de euros de fondos europeos para o Museo de Pontevedra" e que non teñen autoridade para dar "leccións de xestión".
Pola súa parte, Demetrio Gómez (BNG) defendeu que o máis razoable é que o CITA se xestione desde a Deputación e que se comunique co edificio do Palacete das Mendoza (Turismo Rías Baixas) e acusou a Domínguez de estar xa "en campaña".
Esta moción para buscar a reapertura, coa emenda de transferencia á Deputación, aprobouse por unanimidade.
NOVO ALBERGUE MUNICIPAL
Tamén houbo consenso total na votación na moción socialista para crear un albergue municipal e poñer en marcha o programa Housing First (a vivenda primeiro) para persoas sen fogar.
O concelleiro socialista Marcos Rey expuxo que en 2024 foron atendidas 253 persoas na rúa en Pontevedra e que o único recurso actual, de Cáritas, está ao límite da súa capacidade.
Anabel Gulías (BNG) destacou o traballo realizado co terceiro sector, pero aceptou que é necesario "reforzar unha rede propia" ante unha situación complexa.
Desde o PP, Silvia Junco criticou que o goberno local rexeitara no pasado financiamento da Xunta para vivendas para persoas sen fogar, aínda que apoiou a moción para "colaborar coas persoas vulnerables".
DEBATE SOBRE OS BARRIOS
O pleno pechouse cunha moción do PP pedindo un plan de revitalización para os barrios. Pepa Pardo (PP) denunciou a existencia de "barrios de primeira e de segunda", mencionando o "abandono" da Seca, San Antoniño ou a falta de investimentos en Monte Porreiro.
O concelleiro César Mosquera (BNG) respondeu con dureza, cualificando de "esaxeracións" as críticas do PP e lembrando que hai "40 millóns de euros en tramitación" para obras en barrios e parroquias.
Malia o enfrontamento verbal, a moción foi aprobada por todos os grupos.
FREO Á TALA DE ÁRBORES EN SANTA CLARA
A corporación municipal de Pontevedra aprobou, cos votos a favor de BNG e PSOE e a oposición do PP, unha moción de urxencia presentada polo grupo socialista para paralizar de xeito inmediato a tala prevista no recinto do convento de Santa Clara.
O debate evidenciou unha fractura absoluta entre o goberno local, o grupo socialista e o portavoz popular, vicepresidente da Deputación Provincial e actual responsable político do convento de Santa Clara, sobre como debe executarse a integración do antigo cenobio no Museo de Pontevedra e o destino da súa horta histórica.
O portavoz do grupo socialista, Iván Puentes, centrou a súa intervención en denunciar o contrato de 12.000 euros licitado pola institución provincial para realizar o que cualificou de "atentado ecolóxico".
Segundo os datos achegados polo concelleiro, o plan da Deputación contempla a eliminación de 58 árbores de grande e mediana altura, así como de case un centenar de arbustos e outras especies leñosas.
"Vostede, señor Domínguez, vai ser responsable de liquidar máis de 150 árbores nun espazo onde non se podería facer máis que garantir a súa accesibilidade", sinalou Puentes dirixíndose ao líder da oposición e vicepresidente provincial.
Para o PSOE, o xardín e a horta son elementos indivisibles do conxunto conventual que deben conservarse "do xeito máis fiel posible a como chegaron a nós". Puentes sostivo que non existe un informe técnico que obrigue a adoptar esta decisión e que se trata de "unha decisión política" para liberar espazo para un novo edificio.
Pola súa banda, o concelleiro do grupo de goberno César Mosquera (BNG) apoiou a moción socialista e botou man da hemeroteca para criticar o cambio de postura do PP dende que asumiu o mando na Deputación. Mosquera lembrou que, no anterior mandato, a dereita cualificaba de "vandalización" calquera pequena intervención nos xardíns.
"Dá a sensación de que volve 30 anos atrás", afirmou Mosquera, quen acusou ao PP de querer eliminar árbores para aforrar gastos de mantemento. "Recoméndolle que sexa un pouco máis prudente e claro, porque agora vaille de volta", engadiu o edil nacionalista en relación ás críticas que o PP lanzaba no pasado.
Rafa Domínguez rexeitou as acusacións e defendeu que a tala é un paso previo "imprescindible" para o desenvolvemento do proxecto arqueolóxico e a futura ampliación do edificio do museo nese recinto. Domínguez apuntou que as catas recentes permitiron detectar as estruturas doutro convento antigo baixo o solo.
"A tala constitúe un traballo previo imprescindible para permitir o acceso ás zonas de execución e para desenvolver o traballo de escavación arqueolóxica. Se non, non é viable o sondaxe e control", argumentou o concelleiro popular.
Domínguez amparouse nos informes da Estación Fitopatolóxica do Areeiro, sinalando que moitas das árbores teñen as raíces estendidas que afectan á zona construída e presentan unha "baixa probabilidade de transplante".
Asegurou que se solicitou permiso para o proxecto e que, se algún exemplar ten un valor especial, buscarase a súa reubicación, pero foi tallante sobre os prazos: "Santa Clara non se paraliza nin un minuto máis".
O debate pechouse cunha última réplica de Iván Puentes, quen insistiu en que os informes técnicos tamén recomendan a conservación de determinadas especies que o PP pretende talar, mentres se reservan outras de menor valor, como algunhas plantacións de kiwis.
Finalmente, a moción socialista saíu adiante coa maioría de 13 votos de BNG e PSOE, fronte aos 9 votos en contra do PP. O acordo plenario insta á Deputación a:paralizar o contrato de tala controlada publicado o pasado 10 de febreiro; rehabilitar a zona verde preservando as especies árboreas, agás aquelas con problemas sanitarios ou de accesibilidade estritamente xustificados: e, por último, elaborar un proxecto de conservación integral que minimice o impacto da nova construción sobre o conxunto histórico de 800 anos de antigüidade.
Engade Pontevedra Viva como fonte preferida de Google de balde
Mantente informado coas últimas noticias de actualidade.