O Concello de Poio puxo en funcionamento unha brigada municipal propia dedicada á prevención e defensa contra os incendios forestais, co que se converte no primeiro municipio da provincia de Pontevedra en ter operativo este servizo na campaña estival.
A iniciativa desenvólvese a través dun acordo de colaboración coa Consellería do Medio Rural.
O equipo técnico está integrado por oito traballadores que permanecen en activo desde o mércores 1 de xullo.
Durante as dúas primeiras xornadas, os compoñentes da cuadrilla realizaron un período de formación específica destinado a unificar os criterios de intervención no monte e garantir a seguridade dos operarios nas tarefas diarias.
A activación deste recurso coincide cunha situación meteorolóxica de risco derivado da confluencia de altas temperaturas, baixos niveis de humidade ambiental e vento, factores que aceleran a perda de auga da vexetación.
Entre os cometidos asignados á brigada atópanse as tarefas de vixilancia do territorio, a participación directa nos labores de extinción e a execución de tratamentos preventivos mediante o uso de ferramentas manuais e maquinaria lixeira.
Este dispositivo local actúa como complemento dos medios que a Xunta de Galicia desprega na zona, como os helicópteros e as brigadas forestais autonómicas, e súmase ás intervencións que desenvolve a Agrupación de Voluntarios de Protección Civil de Poio.
O alcalde, Ángel Moldes, mantivo un encontro co persoal nas instalacións da Seca para coordinar o inicio dos traballos.
De forma paralela á incorporación deste persoal, o Concello de Poio executou tarefas de acondicionamento nas franxas de protección e realizou melloras na rede de pistas forestais para facilitar o acceso dos camións de bombeiros e motobombas.
Estas intervencións centráronse na vía forestal do Xarraipo, situada na faldra do Monte Castrove, e en terreos forestais próximos a zonas habitadas como Vilariño, Zapata e Río Mouro.