O Concello de Poio xa ten orzamento para 2026. O pleno municipal aprobou definitivamente as contas, que superan os 16 millóns de euros, despois de desestimar as alegacións presentadas durante o período de exposición pública.
O informe técnico da Intervención municipal ratifica a legalidade e coherencia das cifras, asegurando que están adaptadas á normativa vixente.
Segundo o alcalde, Ángel Moldes, estas contas "non só falan de números, falan de persoas".
Moldes subliña que o orzamento blinda os servizos sociais, impulsa investimentos de futuro e incorpora medidas de alivio fiscal para as familias, "mostrando que é posible avanzar con responsabilidade sen deixar a ninguén atrás".
Durante a mesma sesión tamén se aprobou a modificación da Relación de Postos de Traballo (RPT) co obxectivo de optimizar a eficiencia e organización do persoal municipal.
Entre os cambios, inclúense un novo técnico de cultura e deporte, para pasar a unha "planificación estratéxica e profesional, promovendo a cultura e o deporte como motor de cohesión social e dinamización económica".
Tamén incorpora as figuras dun técnico en xestión ambiental, con competencias en materia de medio ambiente e unha praza adicional de oficial de policía local, coas mesmas funcións e condicións que o cadro existente.
O pleno tamén deu luz verde ao convenio de cooperación con Portos de Galicia, que amplía os espazos para a pesca deportiva en Raxó, Combarro e Campelo.
No caso de Campelo, establécense horarios de luns a venres, de 17:00 a 07:00 horas, e sábados e domingos durante todo o día, respectando sempre a prioridade da operativa portuaria.
O Concello asumirá a vixilancia, control e sinalización das zonas.
Engade Pontevedra Viva como fonte preferida de Google de balde
Mantente informado coas últimas noticias de actualidade.