O Concello de Poio rendeu homenaxe este venres ás oito veciñas de Poio, Pontevedra e Ponte Caldelas que deseñaron de xeito altruísta ao redor de 4.000 unidades de máscaras durante as semanas do confinamento na primavera do 2020.
Escenario dese recoñecemento foi a Casa Rosada, onde estiveron a concelleira responsable do departamento de Servizos Sociais, Rosa Fernández (PSOE), e a edil de Seguridade Cidadá, Marga Caldas (BNG), que fixeron entrega dun obsequio a estas mulleres que, grazas á súa implicación e esforzo, "foron todo un exemplo de solidariedade durante os momentos máis duros da pandemia provocada pola covid-19".
Ana María, Pilar, Marina, Emilia, Manoli, Ángeles, Merchi e Carmen non dubidaron en "sumar moitas horas, durante moitos días", tal e como lembraron as integrantes do goberno local, para "confeccionar máscaras de tea, que elaboraron de xeito altruísta para que o Concello as puidese repartir entre a veciñanza, especialmente entre os grupos máis vulnerables, como eran as persoas maiores".
Neste sentido, tanto Rosa Fernández como Marga Caldas insistiron en que "naquelas semanas a situación era moi distinta á actual. Hoxe, por fortuna, a cidadanía ten acceso a máscaras homologadas, pero daquela só podían dispoñer dese material os e as profesionais do sector sanitario, como é lóxico".
Debido a esta situación, este grupo de mulleres solidarias decidiu poñerse mans a obra para elaborar preto de 4.000 máscaras de tea "que foron repartidas a domicilio coa colaboración da Agrupación de Voluntarios de Protección Civil de Poio".
As concelleiras de Servizos Sociais e de Seguridade Cidadá fixeron entrega dos obsequios e resaltaron "a valentía, o espírito solidario e a implicación destas mulleres, que sempre serán un exemplo para todas e todos nós".