Poio estreará este venres un renovado espazo de xogo en Lourido pensado para a infancia e as familias.
Trátase do parque infantil de Costa Xiráldez, que abrirá tras unha reforma integral cunha festa de inauguración na que a espuma e a animación de Javi Solla serán os protagonistas.
O acto arrincará ás 17:30 horas e servirá para presentar unha escultura dedicada ás familias, realizada pola Escola de Canteiros de Galicia, coa que o Concello busca recoñecer o seu papel na vida social e nas políticas públicas municipais.
O novo parque aposta por unha estética inspirada no mar, onde destaca un faro como peza central. A estrutura inclúe tres tipos de tobogáns, plataformas a diferentes alturas, accesos múltiples a través de ramplas de escalada ou túneles, ademais de áreas deseñadas para estimular as experiencias sensoriais.
O espazo de xogo priorizou a accesibilidade, incorporando elementos adaptados para diferentes idades e capacidades. Hai randeeiras de distintos tipos, incluído un en formato niño, así como xogos que permiten a participación de menores con mobilidade reducida.
A zona inclúe balancíns, estruturas xiratorias e outros elementos que manteñen o deseño marítimo.
Esta actuación forma parte dunha estratexia municipal para renovar as áreas infantís en todo o Concello. Nos últimos meses impulsáronse proxectos como a pista pump-track de Poio e as renovacións do parque da Seca, o parque de Cristóbal Colón en Ánkar, a creación dunha pista multideportiva en Vilariño ou a habilitación dos terreos para crear o primeiro parque público en Samieira.