O Concello de Poio reforza a súa aposta pola conciliación familiar renovando o convenio coas ANPAS e ampliando este curso o servizo de comedor escolar ao CEIP de Espedregada, en Raxó.
Este colexio súmase á rede na que xa están incluídos o Isidora Riestra, Chancelas e Lourido.
O alcalde, Ángel Moldes, e a concelleira de Cultura e Educación, Natalia Sabarís, destacaron nunha reunión coas asociacións de pais e nais a importancia deste servizo esencial, do que actualmente se benefician máis de 150 nenos e nenas do municipio.
Este curso, a axuda municipal por cada neno e menú aumentou a dous euros, o que supón un aforro mensual aproximado de 42 euros para cada familia e garante a igualdade de acceso ao comedor escolar.
O ano pasado, o Concello destinou ao redor de 30.000 euros a estas axudas, que se suman a outras iniciativas impulsadas para o benestar das familias de Poio, como os Espazos Concilia, con máis de 1.000 prazas estivais.
A iso hai que engadir as bonificacións no IBI para familias numerosas, a posta en marcha dunha unidade de atención temperá para menores de 6 anos, as escolas deportivas municipais ou a creación de novas áreas de lecer e deportivas.
"Sabemos que as familias necesitan servizos, recursos e apoio para vivir mellor. O noso compromiso é facer de Poio un concello dinámico, con futuro e pensado para elas", concluíu o alcalde.