O Concello de Ponte Caldelas sumouse ás voces de alarma ante o avance da praga de avespa asiática criticando a actuación da Consellería do Medio Rural respecto diso.
Para o goberno local a Xunta limítase a impulsar "convenios absurdos" cos concellos nos que entrega unha simple pértega e dous traxes de protección, polo que pide unha maior implicación.
"Con iso xa se desentenden e remiten todas as alertas ao Concello", quéixase o alcalde, Andrés Díaz.
O Concello, aínda que carece de persoal especializado, está a colaborar cos veciños nos casos máis urxentes, xa que denuncia que as chamadas ao servizo de emerxencias da Xunta son remitidos aos Bombeiros sen que en moitos casos se chegue a actuar. Faino ás veces, asegura, a empresa Tragsa pero pasadas varias semanas, cando os propios veciños xa tomaron a iniciativa colocando trampas caseiras.
"Mentres a Xunta de Galicia perde o tempo o avance é imparable e o ano próximo vai ser moito peor", vaticina Díaz.
Ponte Caldelas está a preparar unha serie de charlas informativas con expertos na materia para axudar aos veciños para combater a presenza da avespa velutina.