A Fundación para a Orientación Profesional de Galiza (forGA) organiza na súa sede de Ponte Caldelas cinco cursos para a formación e a inserción laboral de persoas desempregadas.
Os cursos comezan en setembro e son 100% subvencionados.
O alumnado recibirá a certificación oficial para optar de forma inmediata a postos de traballo na especialidade que elixa.
Inclúen ademais prácticas en empresas e formación en prevención de riscos laborais.
Hai un límite de 15 prazas por curso e as solicitudes deben facerse na web forga.gal.
O único requisito é estar inscrito como demandante de emprego.
Os cursos son de Operacións de fontanaría e calefacción-climatización doméstica; Limpeza en espazos abertos e instalacións industriais; Montaxe e mantemento de instalacións eléctricas de baixa tensión; Xestión de sistemas informáticos, e Xestión de procesos de servizo en restauración.
"Planificamos estes cinco cursos atendendo ás demandas e a realidade do mercado laboral, formando ás alumnas e alumnos dunha maneira práctica para impulsar a súa inserción laboral", explica Antonio Mera, responsable da sede de forGA en Ponte Caldelas.