O programa de andainas 'Patea Tapea' organizado polo Concello de Ponte Caldelas estreouse este sábado con bo tempo e a asistencia de decenas de persoas.
Segundo informou o Concello, a estrea foi un percorrido de 12 quilómetros -acurtado a 6 ou 8 para os menos afeitos ao sendeirismo ou persoas que tiñan menos tempo-. Comezou nas inmediacións da igrexa de Santa Eulalia de Baia, pasou polo sendeiro de San Vicente, polo camiño de Roriz e Laxoso e, despois dunha tapa na taberna desta localidade, regresou ao centro de Ponte Caldelas utilizando o Sendeiro Azul.
Nesta primeira etapa, os sendeiristas tiveron ocasión de ir familiarizándose con todos os tramos dos Sendeiros en Rede (San Vicente, Tres Montes, Almiñas e Sendeiro Azul), que agora quedan completamente interconectados grazas ao deseño e sinalización do novo sendeiro dos Tres Montes.
O calendario que terá continuidade ao longo do ano, aproveitando as posibilidades que ofrecen as catro grandes rutas habilitadas en Ponte Caldelas.