O presidente da Xunta, Alfonso Rueda, destacou o sonsenso co que este martes asinouse en Pontevedra o II Pacto de vivenda de Galicia, co que o goberno autonómico prevé mobilizar preto de 2.000 millóns de euros entre 2026 e 2030 para reforzar as políticas públicas neste ámbito.
"Despois de moita análise, despois de moito diálogo, planificación, execución e colaboración, chegouse a este consenso que acabamos de asinar e a partir de agora o que toca é cumprir", dixo.
O obxectivo é alcanzar as 10.000 vivendas públicas no ano 2030, tras sumar 2.000 novos inmobles aos 8.000 que se espera conformen o parque público residencial en 2028.
Durante o acto, celebrado no Hotel Galicia Palace, Rueda subliñou o efecto tractor que terá este investimento público, que permitirá mobilizar ao redor de 5.000 millóns de euros adicionais por parte de empresas e particulares, ademais de xerar ou manter ao redor de 60.000 postos de traballo no sector.
O financiamento do pacto recaerá maioritariamente en fondos propios da comunidade autónoma, que achegará 1.630 millóns de euros, o 82,67% do total. A esta cifra súmanse 241 millóns procedentes do Estado e outros 100 millóns de fondos europeos.
Segundo o presidente da Xunta, o novo acordo é un exemplo dunha política de vivenda baseada no consenso e a participación dos axentes implicados, co obxectivo de garantir a eficacia e o impacto real das medidas previstas.
Rueda destacou a importancia de "pasar da teoría á práctica" e subliñou que este plan debe cumprirse "con independencia de calquera proceso electoral e de quen goberne", reforzando a idea de que se trata dun compromiso compartido entre administracións de distintas cores políticas.
"Hoxe puxemos negro sobre branco, e agora hai que cumprir", dixo o titular do executivo durante o acto celebrado en Pontevedra, cidade que, segundo el, ejemplifica "a colaboración por cousas que de verdade son importantes".
O mandatario agradeceu a participación dos concelleiros presentes e a chamada do alcalde Miguel Anxo Fernández Lores, quen se desculpou por non poder asistir.
Rueda insistiu na necesidade de actuar "con intelixencia porque os recursos non son ilimitados" e explicou que se explorarán "novas fórmulas de vivenda e axilización de trámites para favorecer a construción, tamén no sector privado".
O plan asinado implica, segundo o presidente, que a Xunta asumirá a responsabilidade directa de entregar 1.000 vivendas públicas para 2030, dentro dun marco de colaboración que prioriza a eficiencia e a correcta distribución entre quen máis o necesita.
Rueda subliñou que cada euro investido será "ben aproveitado" e destacou a relevancia de coordinar cos plans estatais sempre que as condicións sexan viables.
"Galicia calidade tamén é isto, facer vivenda, facela en prazo, facela ben e depués distribuíla ben entre os que máis as necesitan que é tamén entre os que máis as merecen, porque co seu esforzo achegan, cos seus impostos, os cartos para que isto sexa posible", dixo Rueda.
O acto pechou cun chamamento ao traballo conxunto e á execución do acordo. "O que toca agora é porse a traballar. Galicia en materia de vivenda quere aproveitar todo o que se poida ofrecer en condicións realizables. Isto non vai de cores políticas; se sae ben, todo o mundo poderá dicir que tivo participación neste éxito", concluíu.
Na mesma liña, a conselleira de Vivenda e Planificación de Infraestruturas, María Martínez Allegue, destacou que Galicia conta con "unha folla de ruta clara" que pasa por construír novas vivendas, rehabilitar o parque existente e desenvolver solo residencial para responder á demanda.
O II Pacto de vivenda de Galicia fraguouse con "compromiso, traballo e ilusión" no seo do Observatorio da Vivenda de Galicia, un órgano no que están representados todos os colectivos vinculados ao sector, desde a FEGAMP e as organizacións de promotores e construtores até colexios profesionais, cooperativas, asociacións de consumidores e a propia Xunta.
O Pacto de Vivenda da Xunta articúlase en catro liñas que se resumen en facilitar o acceso á vivenda, impulsar a rehabilitación urbana, xestionar solo residencial e aplicar medidas transversais como innovación e axilización administrativa. Inclúe accións específicas para mozos e reforza a vivenda pública como eixo da política social e económica.
Engade Pontevedra Viva como fonte preferida de Google de balde
Mantente informado coas últimas noticias de actualidade.