O Concello de Pontevedra aprobou este xoves na Xunta de Goberno celebrada á primeira hora da mañá a modificación de contrato do servizo de axuda no fogar (SAF).
Segundo explicou a tenente de alcalde, Eva Vilaverde, aprobouse un incremento "até o máximo que nos permite a Lei de Contratos que é do 20%" para aumentar as horas que se prestan.
O contrato do SAF está adxudicado á empresa Idades por un prazo de execución de catro anos e un orzamento de 12,2 millóns de euros, dos que aproximadamente a Xunta asume o 60% e o Concello o 40% restante.
Coa modificación aprobada este xoves polo Concello, auméntanse 28.412 horas ao ano. Isto supón pasar de 154.600 horas ao ano a 183.012.
Para facer posible este incremento o Concello deberá incrementar en 600.000 euros ao ano o que se paga por este servizo, o que sitúa a cantidade en 3,6 millóns de euros anuais.
"Temos solicitudes de máis usuarios e por tanto o que facemos é incrementar as horas, os usuarios e a contía anual até o máximo que nos permite a lei", apuntou Eva Vilaverde.
A portavoz do goberno local ha destacado que "este é un dos servizos, sen dúbida, que eleva máis o orzamento deste Concello" e que é entendido como "necesario, básico e imprescindible neste momento".
A través do SAF, o Concello de Pontevedra atende a persoas maiores con dificultades graves na súa autonomía persoal e que presentan problemas para a realización de determinadas tarefas de carácter persoal ou doméstico; ou persoas con discapacidade física, psíquica ou sensorial, que afecta significativamente á súa autonomía persoal, que vivan soas ou non poidan ser atendidas suficientemente polas súas familias.
Mesmo atenden a familias con especial dificultade de atención de menores debido á carencia de hábitos para un bo funcionamento da vida cotiá, falta de apoios ou problemas no desenvolvemento da estrutura e dinámica familiares, dando prioridade a familias con menores de 12 anos.
Tamén facilita a xestión de crise de carácter temporal sobrevindas, por exemplo convalecencias tras hospitalizacións ou enfermidades terminais.
O SAF de Pontevedra presta servizo nestes momentos a unhas 200 persoas, a maior parte das mesmas maiores dependentes.