A Xunta de Galicia manterá a situación de prealerta por escaseza moderada de auga nos sistemas do río Lérez, que afectan a boa parte da provincia de Pontevedra.
Tras a reunión celebrada este venres pola Oficina Técnica da Seca, presidida polo director de Augas de Galicia, Roi Fernández, estableceuse unha medida de seguimento intensivo para avaliar os caudais e as condicións metereológicas, así como un reforzo do control sobre os sistemas de abastecemento.
Nesta situación atópanse Beariz, Barro, Bueu, O Campo Lameiro, Cangas, Cerdedo Cotobade, A Estrada, Forcarei, A Lama, Marín, Meaño, Meis, Moaña, Moraña, Poio, Ponte Caldelas, Pontevedra, Sanxenxo, Silleda e Vilaboa.
Ademais, mantéñense medidas equivalentes á prealerta, aínda que sen declaración formal, no subsistema de Baiona, dentro da unidade territorial do río Verdugo, do que depende o seu abastecemento.
Ante esta situación, a Xunta fai un chamamento á cidadanía para extremar o aforro de auga, evitando consumos elevados como o enchido de piscinas, o baldeo con auga potable e a aposta por hábitos máis eficientes no fogar.
Así mesmo, recomenda aos concellos reducir os usos non esenciais, como a limpeza de rúas ou a rega de parques, e reforzar a vixilancia dos indicadores para anticipar posibles episodios de escaseza.
No conxunto da Demarcación Hidrográfica Galicia-Costa, a situación xeral mantense en niveis de normalidade, cos encoros ao 83,09% da súa capacidade, aínda que un 10,7% por baixo dos niveis rexistrados hai un ano.
Fóra da provincia de Pontevedra, a Xunta tamén mantén a prealerta por escaseza moderada no sistema do río Anllóns e na Costa da Coruña até o límite con Arteixo, afectando os municipios de Arteixo, Cabana de Bergantiños, Carballo, Cerceda, Coristanco, Culleredo, A Laracha, Malpica de Bergantiños, Ponteceso, Tordoia e Zas.
Engade Pontevedra Viva como fonte preferida de Google de balde
Mantente informado coas últimas noticias de actualidade.