Con motivo do Día Mundial da Parálise Cerebral, a asociación pontevedresa de Amencer Aspace reuniu na praza da Ferrería a unha ampla representación dos seus afiliados para "dar a coñecer a nosa problemática, como tentamos conseguir a nosa normalidade, como reivindicamos os nosos dereitos e deberes, o que necesitamos e que nos axuden a levar esta tarefa a termo", resumiu o presidente do colectivo, Carlos Godoy.
O acto, que se celebrou de forma simultánea en todas as cidades de España na que hai algunha asociación relacionada coa parálise cerebral, consistiu nunha concentración nesta céntrica praza e na lectura dun manifesto por parte de colaboradores, afiliados e familiares de Amencer Aspace.
"Pedimos atención en todos os ámbitos, durante toda a vida e sen importar o lugar de residencia; coordinación entre os servizos sanitarios e sociais; investigacións sociais para determinar as necesidades reais das persoas con parálise cerebral e recursos suficientes en todas as comunidades autónomas", recollía o manifesto.
O lema deste ano, e que se converteu en tema de tendencia ás doce horas, é Dálle a Volta. Unha iniciativa coa que este colectivo anima ao resto da sociedade a poñerse no lugar dunha persoa con parálise cerebral. "Que pensen que pasaría se o mundo fóra ao revés, se fora a maioría a que tivese esta patoloxía", explica Godoy.
Os problemas que teñen que afrontar cada día estas persoas afectan a todos os ámbitos da súa vida. "Non só á accesibilidade física a unhas instalacións, tamén ás redes sociais, aos medios de comunicación. Teñen tamén problemas sanitarios, educativos, sociais, etcétera. Ao ser diferente sempre vas ter problemas dalgunha maneira", admite o presidente de Amencer Aspace.
Nesta asociación, que atende a 140 afiliados, ofrecen ás persoas con parálise cerebral un servizo integral desde as idades máis temperás ata a etapa adulta. "Cando as familias se achegan a nós ofrecémoslles un servizo de asesoramento e valoración para ver onde encaixaría mellor o seu fillo. Logo temos un programa de atención temperá con moitos tipos de profesionais e, a partir dos seis anos, pasan aos colexios de Educación Especial ata os 21 e despois, aos centros de día", detalla Godoy.