A área sanitaria de Pontevedra-O Salnés continúa unha progresión ascendente do número de casos activos. Este domingo 14, a Consellería de Sanidade comunica que hai oito casos activos máis que na xornada do sábado, situando a cifra de enfermos en 95, cunha persoa ingresada nas últimas horas con covid-19, que se atopa en planta do Hospital do Salnés.
A través das probas PCR detectáronse 12 novos positivos nas últimas 24 horas. Non se rexistraron falecementos nos últimos días na área sanitaria. O número de decesos desde o inicio da pandemia continúa sendo de 205 persoas.
A situación en Galicia, segundo os datos da Consellería de Sanidade, tamén mantén a liña de incremento de casos. Este domingo hai 1.179 persoas coa infección activa, 102 casos máis que o sábado. A través de probas PCR detectáronse 137 novos casos. Son dous contaxios diarios máis respecto a os notificados durante o sábado e 63 máis en relación ao sábado anterior.
Por áreas sanitarias, as cifras de casos activos é a seguinte: Pontevedra-O Salnés: 95 (+8); A Coruña-Cee: 298 (+21); Ourense: 287 (+16); Vigo: 182 (+22); Lugo: 119 (+18); Santiago-O Barbanza: 103 (+9); e Ferrol: 95 (+8).
Descenderon o número de persoas hospitalizadas. Hai 36 enfermos con covid-19 na planta de hospitalización, un menos que o sábado; e 10 pacientes nas Unidades de Coidados Críticos, dous menos que na xornada do 13 de novembro.
Curáronse 34 persoas nas últimas 24 horas e non se rexistraron falecementos. O número de mortes en Galicia de pacientes con coronavirus mantense en 2.655 persoas.