O xardín do Hospital Provincial de Pontevedra, ante o Monumento á Doazón, acolleu este mércores 25 o acto conmemorativo do Día Nacional do Transplante.
A xornada reuniu a responsables da área Sanitaria de Pontevedra e O Salnés, representantes do goberno local e provincial, e membros de asociacións de pacientes co obxectivo de visibilizar a importancia das doazóns e recoñecer o labor técnico do sistema de saúde.
Natalia Botana Rey, directora territorial da Consellería de Sanidade en Pontevedra, informaba durante o encontro de que a área sanitaria rexistra niveis de doantes que se atopan entre os máis elevados da comunidade autónoma.
Botana Rey sinalou que estas cifras reflicten a resposta da poboación da área ante a necesidade de órganos para transplantes.
Durante a súa intervención, a directora territorial incidía nun factor técnico: o tempo. Botana Rey apuntaba que a planificación e a comunicación previa do desexo de ser doante son elementos que axilizan os protocolos médicos e a loxística necesaria.
Segundo a responsable sanitaria, esta decisión tomada de antemán polo cidadán facilita o proceso de actuación dos equipos médicos e alivia a carga de decisión das familias en situacións de duelo.
Celso García Estévez, presidente da Asociación de doantes e receptores de órganos de Vigo (ADROVI), centrou a súa intervención na figura dos coordinadores de transplantes. García describiu o labor destes profesionais como un nexo entre a perda e a posibilidade de supervivencia doutros pacientes.
O presidente de ADROVI subliñaba a preparación destes equipos para xestionar a comunicación cos familiares en momentos de falecemento, unha tarefa que cualificou como de alta complexidade técnica e humana.
Ao evento asistían, entre outras autoridades, a tenente de alcalde de Pontevedra, Eva Vilaverde, e dúas concelleiras do Partido Popular.
No transcurso do acto dábase lectura ao comunicado titulado "A arte de tecer vida", un texto que define aos coordinadores como responsables da precisión loxística e o acompañamento durante o proceso de doazón.
O escrito lembrou que o sistema de transplantes depende dunha estrutura de gardas permanentes e da capacidade de xestión dos quirófanos e as listas de espera, elementos que permiten transformar a vontade dos doantes en resultados clínicos tanxibles.
A área sanitaria de Pontevedra e O Salnés rexistraba ao longo de 2025 un total de 11 persoas doantes de órganos, realizándose a extracción de 34 órganos. Estes órganos permitiron que se realizaran transplantes a 28 persoas receptoras.
A representante da Consellería de Sanidade lembrou que é posible realizar o trámite legal das instrucións previas no Departamento Territorial da Xunta e nos tres hospitais da área sanitaria de Pontevedra (Provincial, Montecelo e O Salnés) para expresar a vontade de doar cando faleza e o destino que se lle pode dar aos órganos.
Se quere deixar constancia de feito simbólico - sen compromiso legal definitivo - para que a súa contorna sexa coñecedora dos seus desexos pode facelo cubrindo a tarxeta de doante dispoñible na web de ADOS, do Sergas e das asociacións que colaboran, remitíndoa ao enderezo que indica ADOS na súa páxina web.
Esa tarxeta manifesta a vontade pero sen carácter vinculante.
Para obter máis información está dispoñible o teléfono 881 542 863 e o correo electrónico: [email protected]