Aínda que quedan seis meses para o prazo fixado para o remate das obras do campo de fútbol de Salcedo, que teñen que estar listas antes do 31 de outubro, os populares temen que se produza un novo atraso.
Así o alertou o edil Guille Juncal que, acompañou ao portavoz municipal do PP, Rafa Domínguez, nunha visita a estas instalacións de deportivas para reunirse con representantes veciñais e da SCD Salcedo para facer un seguimento destes traballos.
"Todo apunta a que o campo non estará operativo para o comezo da pretempada", explicou Juncal, o que sería un "novo prexuízo" para o tecido deportivo de todo Pontevedra.
O PP centra o seu temor en dúas preocupacións concretas, unha delas o mal estado do acceso por estrada ás instalacións, que se atopa en condicións "moi precarias".
Isto dificulta, denuncian desde a oposición municial, a entrada de coches e autobuses e afecta ao club de ciclismo da zona.
A iso, Juncal sumou o "absurdo" de non habilitar un acceso directo dende o aparcadoiro lindeiro ao campo de fútbol, o que obrigará a xogadores e afeccionados "a dar un rodeo innecesario de 600 metros", segundo o concelleiro popular.
Para o responsable da área de deportes no PP, o goberno municipal "sempre actúa a base de remendos, improvisando segundo aparecen os problemas, o que adoita xerar problemas engadidos por non escoitar aos cidadáns".
Os populares da cidade apostan por crear unha concellería de Deportes "dilixente" a partir do 2027, cunha "folla de ruta clara" en materia de creación e mantemento das instalacións deportivas.