O presidente da Autoridade Portuaria de Marín e Ría de Pontevedra, José Benito Suárez Costa, recibiu a unha delegación de empresarios ecuatorianos do sector atuneiro, encabezados por Andrés CuKa, presidente da Cámara Ecuatoriana de Industrias Procesadoras Atuneiras (CEIPA).
O atún constitúe unha das principais mercadorías dentro do tráfico de pesca conxelada que xestiona o porto pontevedrés, consolidado como un enclave estratéxico para a recepción, almacenamento e procesado deste produto altamente demandado nos mercados globais.
Ecuador, un dos grandes referentes mundiais na industria atunera, concentra boa parte da súa actividade nas provincias de Manabí, Guayas e Santa Elena.
Desde alí, unha ducia de empresas integradas en CEIPA, organización creada en 2002 para impulsar a proxección internacional do sector, articulan unha potente cadea de valor que abarca desde a captura até a transformación do produto.
Durante o encontro, Suárez Costa expuxo as vantaxes competitivas que ofrece o Porto de Marín para este tipo de tráficos, con infraestruturas especializadas, operadores loxísticos experimentados e unha rede empresarial altamente cualificada no tratamento e comercialización de produtos pesqueiros.
A axenda da delegación incluíu tamén visitas técnicas a firmas da contorna portuaria, como Cabomar e Protea, onde puideron coñecer de primeira man o funcionamento do sistema Libra, unha ferramenta dixital avanzada que optimiza a conectividad dos procesos e garante a trazabilidad na cadea de servizos vinculados á actividade pesqueira.
Acompañados por responsables da empresa EDISA, os representantes de CEIPA comprobaron así como a dixitalización e a eficiencia loxística convertéronse en aliados fundamentais para reforzar a competitividade do sector.
A xornada deixa aberta a porta a futuras colaboracións entre Galicia e Ecuador, dous territorios unidos polo mar e por unha industria que mira cada vez máis cara á innovación sen perder de vista a súa vocación global.