Portocelo, Mogor e parte de Aguete estrean xullo con socorristas

Marín
01 de xullo 2020

Estas tres praias contan con este servizo activo desde a tarde deste mércores 1 de xullo e o resto de praias poderán contar cos socorristas a partir do venres. Este xoves está previsto realizar unha nova proba de selección para cubrir as vacantes que aínda están dispoñibles 

Primeiro día con socorristas nas praias de Marín
Primeiro día con socorristas nas praias de Marín / Concello de Marín

As praias de Portocelo, Mogor e Aguete 1, en Marín, estrearon o mes de xullo con socorristas vixiando a seguridade do areal. 

Segundo a información facilitada polo Concello de Marín, estas tres praias contan con este servizo activo desde a tarde deste mércores 1 de xullo e o resto de praias poderán contar cos socorristas a partir do venres.

Ademais, o Concello deu a coñecer que este xoves está previsto realizar unha nova proba de selección para cubrir as vacantes que aínda están dispoñibles. Será en Mogor a partir das 10.00 horas.

Marín tamén está rematando de configurar o sistema informático de conteo en tempo real do aforo das praias, un mecanismo de control que se traducirá nun semáforo con catro niveis (baixo, medio, alto e completo) que se poderá consultar a través da web do Concello, das redes sociais e dunha aplicación.

O sistema estará funcionando ao cen por cen previsiblemente a partir do venres, especialmente pensando de cara á fin de semana, cando se nota unha maior afluencia de persoas aos areais.