O Partido Popular de Pontevedra criticou este mércores a ausencia do goberno local do BNG, na Feira Internacional de Turismo (Fitur), que se celebra desde hoxe en Madrid, unha decisión que se repite por terceiro ano consecutivo.
Os populares consideran incoherente que o Concello renuncie a este escaparate turístico nacional e internacional mentres o alcalde, Miguel Anxo Fernández Lores, mantén para o primeiro trimestre de 2026 unha axenda de viaxes institucionais que inclúe visitas ao Banco Mundial, en Washington, ou encontros en Italia.
En rolda de prensa, a concelleira do PP Silvia Junco subliñou a relevancia de Fitur como "escaparate estratéxico" para a promoción turística e como un espazo fundamental para situar a Pontevedra no mercado nacional. Neste sentido, lembrou que o 90 % das persoas atendidas o pasado verán na Oficina de Turismo da cidade eran de procedencia española, un dato que, ao seu xuízo, "ya justificaría por sí solo la presencia del Concello en la feria".
Junco lamentou ademais que Pontevedra sexa, xunto con Ourense, a única gran cidade galega que non participa en Fitur, fronte á presenza da Coruña, Santiago, Ferrol, Lugo e Vigo, gobernadas por partidos de distinto signo político. "Esto no va de ideologías, va de aprovechar oportunidades", afirmou.
Desde o PP cuestionaron o modelo promocional do BNG, que descarta Fitur por considerar que non achega valor, pero aposta por viaxes institucionais a destinos como Estados Unidos ou Italia. Neste sentido, reclamaron ao goberno local que explique cal é a súa estratexia para decidir que foros turísticos considera prioritarios e sinalaron que Fitur permite pechar contactos profesionais, xerar oportunidades de promoción e atraer visitantes co obxectivo de desestacionalizar o turismo.
A edil popular tamén destacou o momento turístico que atravesa a cidade, con cifras récord de peregrinos do Camiño Portugués e a celebración en 2026 do centenario do Santuario das Aparicións, o terceiro santuario mariano máis importante do mundo. Aínda que recoñeceu que a ausencia na edición actual xa non pode corrixirse, pediu ao alcalde que "recapacite" de cara a 2027, ano no que volverá celebrarse o Ano Santo.
Por último, Junco criticou o "silencio" do PSOE local ante esta decisión e apoiou a presenza en Fitur da Deputación de Pontevedra e da Xunta de Galicia, institucións que, ao seu xuízo, contribúen a reforzar a proxección turística da capital das Rías Baixas.
Pola súa banda, o alcalde de Pontevedra, Miguel Anxo Fernández Lores, defendeu a ausencia do Concello en Fitur e asegurou respectar todas as posturas, aínda que insistiu en que o goberno local aposta por un modelo turístico alternativo, baseado na desestacionalización e na atracción de grandes eventos culturais e deportivos. Como exemplo, citou a gala dos Premios Feroz e os mundiais de Tríatlon celebrados en 2025, que, segundo indicou, xeraron un impacto económico de 33,5 e 21,7 millóns de euros, respectivamente.
Lores sostivo que este tipo de eventos ofrecen unha promoción "imposible de pagar" por outras vías e lembrou que Pontevedra é unha cidade recoñecida internacionalmente, tamén polas súas políticas de peonalización e seguridade viaria.
Neste sentido, avanzou que o Concello participará en foros internacionais en Italia, xunto a cidades como París e Oporto, e en encontros do Banco Mundial para compartir a experiencia da cidade en mobilidade sostible, calidade do aire e mellora da calidade de vida.
"Xa hai moitos anos que ou Concello de Pontevedra decidiu tomar un camiño propio para moitas cousas, entre elas tamén para a promoción e proxección internacional de Pontevedra", afirmou o rexedor, quen defendeu que os resultados deste modelo foron positivos e que, fronte á participación en feiras turísticas tradicionais, a estratexia municipal resulta máis rendible para a cidade.