No que vai de ano, as estradas pontevedresas cobraron a vida de seis persoas. Delas, cinco eran maiores que morreron atropelados.
Este "anómalo" rexistro mortal, como o cualificou o subdelegado do Goberno en Pontevedra, Abel Losada, "é difícil de explicar" e espertou as alarmas en Tráfico.
Para tentar frear esta tendencia, as autoridades pediron a colaboración dos 61 concellos da provincia.
Fíxoo o propio Losada, que se dirixiu por carta aos alcaldes e alcaldesas de todos estes municipios para pedirlles que se sumen á campaña da DXT.
Trátase de sesións formativas, dirixidas especificamente ao colectivo de persoas maiores, que comezarán por Vilaboa o próximo 22 de abril.
Aínda que a DXT puxo o foco nos peóns que cruzan a calzada mirando o móbil, en Pontevedra esa campaña estará enfocada aos maiores que camiñan polas estradas.
O subdelegado fixo un chamamento á "prudencia" nas estradas, tanto aos peóns como aos condutores, para que esta situación se corrixa "canto antes".
"É moi importante pór atención e tentar solventar isto na medida do posible", sentenciou Abel Losada.
Dous dos falecidos por atropelos rexistráronse en febreiro, en Cerdedo Cotobade e Mos; outros dous en marzo, en Rodeiro e Vilanova de Arousa; o quinto, hai apenas uns días, o 1 de abril en Tomiño.