Preocupación en Cerdedo-Cotobade por dous incendios de orixe accidental

Dous incendios forestais declarados con moi pouco tempo de diferenza xeraron preocupación en Cerdedo-Cotobade.

Un iniciouse sobre as 13.36 horas na parroquia de Tenorio e o outro menos de 20 minutos despois, sobre as 13.53 horas, en San Xurxo de Sacos.

En ambos os casos, trátase de incendios de orixe accidental, segundo confirmou o alcalde, Jorge Cubela. Así, todo apunta a que empezou a arder como resultado dos traballos de roza que estaban a realizar dous tractores mecanizados.

No caso do incendio de Tenorio, rexistrouse no lugar de Covas, nas Cachadiñas. É a de máis extensión dos dous declarados. O Concello calcula que calcinou aproximadamente 6 hectáreas. 

Segundo a información oficial do Concello, o lume obrigou ao desaloxo preventivo de cinco vivendas e arredor de 30 veciños, co obxectivo de garantir a súa seguridade ante o avance do lume e o forte vento, que complicou as tarefas de extinción.

Segundo confirmou a Consellería de Medio Rural, desprazouse até a zona a medios aéreos e terrestres para traballar na extinción.

Así, traballan dous hidroavións, catro helicópteros, dous axentes, cinco brigadas, dúas motobombas, dúas pás e dous técnicos.

Tamén colaboraron activamente os operarios municipais, membros de Protección Civil de Cerdedo-Cotobade e da Garda Civil.

O segundo incendio iniciouse ás 13.35 horas no lugar da Longa, en San Xurxo de Sacos.

Neste caso, segundo confirma Jorge Cubela, á primeira hora da tarde xa estaba extinguido. Lograron sufocalo os veciños e traballadores das brigadas municipais.

Durante todo o operativo estiveron presentes o alcalde e o tenente de alcalde, Fernando Vázquez, apoiando o traballo dos efectivos e mantendo contacto cos veciños. Moitos residentes da zona tamén colaboraron voluntariamente nas tarefas de apoio e extinción.