O rexeitamento dun grupo de veciños da rúa Cruceiro ante a apertura do novo centro social de Rexurdir no seu edificio chegou este martes ao rexistro municipal. Conseguiron reunir 1.265 firmas e entregáronas pedindo ao alcalde, Miguel Anxo Fernández Lores, que admita as súas reivindicacións.
Os veciños manteñen que se opoñen á apertura do centro de atención a persoas sen fogar nun baixo do edificio número 17 da rúa por "ser prexudicial para a normal convivencia dos cidadáns da contorna".
O escrito que acompaña as firmas traslada ao alcalde a "preocupación" e o "sentir" dunha parte da sociedade pontevedresa que expresou a súa "oposición" á apertura do centro por "non ser unha localización idónea".
A súa intención é que o Concello "tome coñecemento" do problema que aseguran que se lles expón como veciños e "actúe en consecuencia" buscando unha nova localización para o centro "que non xere conflitos coa cidadanía".
Este desacordo coa localización do centro de Rexurdir xa a manifestaban nas última semanas tanto a través de escritos colgados polas rúa do barrio como en reunións co Concello e coa asociación Rexurdir.