O Concello de Poio fixo un balance positivo do programa de actividades deseñado para fomentar hábitos de vida saudables entre a poboación maior de 55 anos.
A iniciativa desenvolveuse durante as últimas oito semanas coa participación de preto de 300 persoas.
A programación, impulsada en colaboración coa Rede Galega de Promoción da Saúde (REGAPS), tivo como obxectivo favorecer a adquisición e consolidación de rutinas beneficiosas para a saúde física e emocional, á vez que promovía o envellecemento activo.
Ao longo das xornadas organizáronse actividades en todas as parroquias do municipio, onde se combinou exercicio físico, alimentación saudable e formación en benestar.
Entre as propostas destacaron varias camiñadas por distintos puntos da contorna, con percorridos entre Campelo e Lourido, Raxó e O Covelo, así como desde A Reiboa até Campelo.
Estas rutas permitiron ás persoas participantes realizar actividade física ao aire libre mentres coñecían o patrimonio natural e paisaxístico de Poio.
A iniciativa completouse con almorzos saudables e sesións informativas sobre hixiene do soño, celebradas en diferentes espazos municipais. Nestes encontros abordáronse cuestións como a importancia do descanso, a adopción de rutinas saudables e os beneficios dunha alimentación equilibrada.
A concelleira de Saúde, Tamara González, que acompañou aos participantes en diversas actividades, destacou a elevada participación e o interese mostrado.
"En Poio contamos cunha poboación moi activa, implicada e con ganas de participar en actividades que contribúan a mellorar a súa calidade de vida", sinalou.
González subliñou ademais que "a resposta foi extraordinariamente positiva, o que demostra que existe unha gran conciencia sobre a importancia de manter hábitos saudables e de participar en propostas que favorecen tanto o benestar físico como o emocional".
A edil incidiu en que este tipo de programas non só promoven a saúde, senón que tamén xeran espazos de encontro, convivencia e intercambio de experiencias entre os participantes.