A Xunta de Galicia anuncia que completará o vindeiro día 23 de decembro a modernización do transporte público interurbano nas comarcas de Pontevedra e O Salnés coa posta en marcha do novo contrato deseñado ao abeiro do Plan de Transporte Público de Galicia, que suporá a entrada en funcionamento de 95 novas liñas.
Na comarca de Pontevedra, habilitaranse 61 novas liñas que garantirán o emprego de 23 condutores e 17 acompañantes. Para O Salnés poranse en marcha 34 liñas con emprego para 22 condutores e 7 acompañantes.
COMARCA DE PONTEVEDRA
O novo contrato sueste da comarca de Pontevedra abrangue aos concellos de Cerdedo-Cotobade, Ponte Caldelas, A Lama, Fornelos de Montes e Pontevedra.
Dentro das liñas deste novo contrato, 52 prestarán servizos compartidos, o que permitirá aos usuarios aproveitar as prazas baleiras dos autobuses escolares; e 20 prestarán servizos baixo demanda, atendendo a un total de 301 paradas.
Unha das melloras incorporadas é a do servizo do IES Ponte Caldelas, que une Fornelos e a zona sur do municipio. Nesta liña incrementouse unha expedición baixo demanda en calendario non lectivo para ofrecer aos usuarios da zona a mencionada conexión con Ponte Caldelas e as liñas que van a Pontevedra.
COMARCA DO SALNÉS
O novo contrato centro da comarca do Salnés botará a andar na área que conforman os concellos da Illa de Arousa, Barro, Cambados, Caldas de Reis, Meaño, Meis, Pontevedra, Portas, Ribadumia, Vilagarcía de Arousa e Vilanova de Arousa.
A reordenación do esquema de liñas de autobús interurbano supón melloras na prestación dos servizos para adaptalos ás necesidades actuais destes municipios, permitindo a simplificación de rutas que compartían de xeito parcial o seu itinerario. Deste xeito, 14 liñas prestarán servizos integrados, para atender os traslados de 282 escolares e permitir aos demais usuarios beneficiarse da modalidade de transporte compartido.
Unha das liñas que se unifica, mantendo a frecuencia, atópase no concello de Portas, onde as conexións entre Currás, San Mauro e Curro reordénanse na nova liña Currás (Romai)-Curro de Embaixo.
A simplificación no deseño dos servizos non reduce o número de expedicións. Mesmo houbo unha ampliación no caso da liña Vilagarcía de Arousa - Hospital, que incrementará os seus horarios e os servizos diarios de 2 a 12, de luns a venres.
PÁXINA DE CONSULTA BUS.GAL
Para que as persoas usuarias do transporte público estean informadas dos cambios, a Xunta dispón do sitio web Bus.gal. Neste enderezo web aparecen dispoñibles todas as liñas e horarios referidos aos diferentes ámbitos territoriais.
Ademais, tamén ofrece a posibilidade de descargar unha ficha informativa dos servizos actualizados para cada municipio que se implantarán o día 23 de decembro. Para obtela é preciso dirixirse á pestana de ‘descargas’ do sitio web e seleccionar o concello que sexa de interese.