Primeiro Camiño Escolar Seguro en Sanxenxo con estudantes do colexio da Florida

O Concello de Sanxenxo porá en marcha este mércores 29 de outubro o primeiro Camiño Escolar Seguro co alumnado do colexio da Florida, apostando pola mobilidade sostible e a seguridade infantil.

O proxecto, impulsado conxuntamente polas áreas municipais de Educación e Seguridade Cidadá e Emerxencias, ten entre os seus obxectivos diminuír a presenza de vehículos particulares nas inmediacións do centro escolar e promover a independencia e socialización dos estudantes.

Para preparar o percorrido, alumnado de 5º de Primaria realizaba este martes unha simulación guiados polo policía local Abelardo Martínez, coñecido como o Poli Paco, experto en seguridade viaria; docentes do centro; os concelleiros Nati Parada e Xoán Pérez; e a presidenta da ANPA, Pomba Otero.

Durante o traxecto repasaron as principais cruces, puntos do camiño e a localización de comercios colaboradores onde os escolares poden solicitar axuda se a necesitan.

Como parte do proxecto, pintáronse pictogramas nos pasos de peóns para reforzar as normas básicas de seguridade: deterse, mirar, comprobar que o vehículo está parado e cruzar.

Ademais, nas últimas semanas habilitáronse seis puntos de encontro, sinalizados para facilitar a organización dos desprazamentos en grupo segundo a zona de residencia dos alumnos: Cruzamento Rúa Ourense-Rúa Progreso, Rúa Madrid (Concello), Cruzamento Rúa Cesteiros-Progreso, Avenida de León (Praia A Carabuxeira), Rúa Miraflores e Camiño da Carabuxeira.

A comunidade local súmase ao proxecto, con aproximadamente trinta establecementos comerciais identificados mediante adhesivos nos seus escaparates como puntos de apoio para os escolares.

A Policía Local realizará labores de supervisión durante as primeiras semanas, mentres que varias familias colaborarán nos traxectos.

Tras esta experiencia piloto, o Concello de Sanxenxo planea estender a implantación de Camiños Escolares Seguros ao resto de centros educativos en próximos cursos.