Cinco dos doce detidos no marco do operativo contra o narcotráfico desenvolvido esta semana na comarca do Salnés, no que morreu un dos investigados ao recibir un disparo da Policía, están xa en prisión.
Así o ordenou a titular da praza 1 da sección civil e de instrución do Tribunal de Instancia de Vilagarcía de Arousa, que é quen dirixe esta investigación.
Para eses cinco arrestados, a maxistrada decretou prisión provisional, comunicada e sen fianza, segundo confirmou o Tribunal Superior de Xustiza de Galicia.
Outros catro investigados quedaron en liberdade provisional, aínda que terán que comparecer mensualmente nos xulgados e retirar o pasaporte, prohibíndolles saír do territorio nacional.
O resto dos detidos que pasaron a disposición xudicial, outro tres, quedaron en liberdade provisional sen fianza e sen máis medidas.
A causa contra eles séguese por un delito de tráfico de drogas das que causan grave dano á saúde, en cantidade de notoria importancia, e pertenza a grupo criminal.
Na operación practicáronse rexistros en vivendas, naves e garaxes dos partidos xudiciais de Vilagarcía e Cambados, así como en domicilios de Madrid e Vigo.
O operativo policial desenvolveuse principalmente nos municipios pontevedreses de Vilagarcía, Vilanova de Arousa, Ribadumia e Cambados.
Durante unha das actuacións, en Cambados, morreu un dos presuntos implicados na trama ao recibir un disparo da Policía cando procedían a detelo na súa vivenda.
Este feito está a ser investigado nunha causa aparte nos xulgados de Cambados.