A Deputación de Pontevedra iniciará unha actuación de emerxencia na estrada provincial EP-8002, que une Caldas de Reis con San Clemente, tras detectarse un risco de afundimento nun tramo próximo ao casco urbano.
A intervención obrigará ao corte total da vía entre os puntos quilométricos 0+400 e 0+600 a partir deste martes 12 de maio, despois de que o pasado venres xa se pechase un dos carrís ao tráfico.
Segundo os informes técnicos realizados pola institución provincial, baixo a calzada apareceron importantes cavidades nunha zona sustentada por un muro de contención de gran altura.
Estas oquedades están a provocar a perda progresiva do material de recheo baixo o firme, unha situación que xa se fixo visible coa aparición de gretas no pavimento.
Os técnicos advirten de que, de non actuar de maneira inmediata, podería producirse o afundimento da estrada, co conseguinte risco para a circulación e para a seguridade viaria.
Por este motivo, a Deputación decidiu executar unha obra de emerxencia que terá un prazo estimado de tres meses e un investimento próximo aos 150.000 euros.
A actuación incluirá o fresado do asfalto e a retirada de terras ata chegar á base da estrutura de contención.
Ademais, acometeranse traballos de drenaxe para canalizar correctamente a auga procedente dun nacemento natural localizado baixo a estrada, considerado un dos factores que contribuíron ao deterioro da vía.
Posteriormente realizarase o recheo, compactación e reposición do firme para recuperar a circulación con garantías de seguridade.
O corte da estrada tamén obrigará a reorganizar os servizos de transporte escolar e regular os tráficos afectados pola incidencia.
Neste sentido, a Deputación xa mantivo contactos coa Xunta de Galicia e coas empresas concesionarias para coordinar rutas alternativas.
Para os autobuses de maior tamaño establecerase un percorrido alternativo entre o CEIP San Clemente de César e o núcleo urbano de Caldas de Reis, pasando por San Clemente, Casaldrago, Cernadas e Carracedo.
No caso dos minibuses, as compañías adaptarán os itinerarios ás novas condicións de circulación mentres duren as obras.