A Deputación de Pontevedra publicou este venres no Boletín Oficial da Provincia a convocatoria e as bases para cubrir 21 prazas no Consorcio Provincial de Pontevedra para a prestación do servizo contra incendios e salvamento.
Así o anunciou o presidente provincial, Luis López, quen destacou que "seguimos cumprindo co consorcio" e sinalou o clima de diálogo que permitiu aprobar o primeiro convenio colectivo, impulsar a relación de postos de traballo e, agora, activar os procesos selectivos.
En concreto, a convocatoria inclúe 19 prazas de persoal laboral fixo (17 bombeiros da categoría C2 e dúas de xefes de parque da categoría C1), ás que se suman dúas prazas de persoal funcionario (unha de técnico de relacións laborais e outra de administrativo).
O calendario administrativo indica que haberá 20 días hábiles para presentar solicitudes, un mes para a publicación da lista provisional de admitidos e excluídos, dez días para emendar posibles erros e, finalmente, a lista definitiva, que incluirá as datas dos primeiros exames.
López subliñou que este é o resultado dun "marco de diálogo sereno, honesto e estable", ao tempo que fixo un chamamento a manter esa canle de entendemento.
O presidente provincial informou destes e doutros asuntos nunha rolda de prensa posterior á Xunta de Goberno celebrada este venres.
Nela tamén deu conta da aprobación dun convenio marco, dotado con 400.000 euros, para a implantación, uso e soporte do padrón municipal de habitantes nos concellos de menos de 50.000 habitantes.
O acordo, cunha duración máxima de cinco anos, permitirá aos municipios dispoñer dunha solución tecnolóxica avanzada que facilitará a xestión do padrón e a integración coa administración electrónica e co Instituto Nacional de Estatística.
No eido deportivo, o goberno provincial aprobou tamén a concesión de 100.000 euros a 118 entidades da provincia na segunda convocatoria da liña de axudas para a adquisición de bens e servizos destinados á organización de campionatos e eventos deportivos. Sumadas á primeira convocatoria, un total de 266 entidades beneficiaranse de 220.000 euros.
As axudas, de ata 1.000 euros por entidade, permiten cubrir gastos como medallas, trofeos, material promocional ou servizos de asistencia sanitaria, seguridade, montaxe, cronometraxe ou arbitraxe.
Outro dos proxectos destacados é a posta en marcha dunha plataforma de visitas virtuais ao Castelo de Soutomaior e á súa ruta das camelias, cun investimento superior aos 61.000 euros financiados con fondos europeos NextGeneration.
A Deputación está a traballar no deseño do percorrido virtual, na dixitalización dos espazos e na elaboración dos contidos, aproveitando a época de floración das camelias para enriquecer a experiencia dixital.
Por último, Luis López anunciou que este luns, 19 de xaneiro, se publicarán as axudas para o fomento da igualdade dirixidas aos concellos de menos de 20.000 habitantes e ás entidades de iniciativa social. En total, estarán dotadas con 500.000 euros, case un 9% máis do previsto inicialmente.
Deste importe, 260.000 euros destinaranse aos concellos para mellorar a atención ás vítimas da violencia machista e apoiar ás mulleres en situación de vulnerabilidade, mentres que 240.000 euros irán ás entidades sociais sen ánimo de lucro para programas de sensibilización, prevención e promoción da igualdade.
Segundo o presidente, este incremento "volve avalar o compromiso firme deste goberno coa igualdade e coa loita contra a violencia machista".
Engade Pontevedra Viva como fonte preferida de Google de balde
Mantente informado coas últimas noticias de actualidade.