Como afrontar un potencial incendio en instalacións santiarias coa maior seguridade posible.
É o obxectivo das xornadas de formación en emerxencias que a Área Sanitaria de Pontevedra e O Salnés ofreceu a profesionais do servizo de Atención Primaria do Centro de Saúde de Caldas de Reis e tamén aos da cuarta planta do Hospital de Montecelo en Pontevedra.
Esta actividade impartiuse co apoio dunha Unidade Móbil de Formación dotada con recursos necesarios para combater o lume de maneira segura.
Os participantes, ao longo da mañá deste venres, puideron adquirir coñecementos teóricos e prácticos dunha primeira intervención ante un potencial incendio ou emerxencia que se poida producir no centro sanitario.
O contido teórico desta formación incluíu unha parte específica que analizou a tecnoloxía do lume, os seus elementos e formas de prevención.
Tamén se estudou a localización e clasificación dos extintores, mecanismos de proxección, as súas precaucións e os tipos de extinción adecuados a cada tipo de combustible.
Complementouse a información con conceptos do Plan de Autoprotección Hospitalario e, no caso do centro de Atención Primaria de Caldas de Reis, con cuestións técnicas do Documento de Medidas de emerxencia nos centros de saúde.
No que respecta á parte práctica, os profesionais sanitarios recibiron nocións sobre conceptos e técnicas de manexo de medios de extinción en situacións de lume real.