A conselleira de Medio Ambiente e Cambio Climático, Ángeles Vázquez, mantivo este luns unha reunión co presidente da Autoridade Portuaria de Marín, José Benito Suárez, e o director, Miguel Ángel Navarro, para estudar posibles vías de colaboración en materia ambiental.
O encontro celebrouse nas instalacións portuarias da vila pontevedresa e permitiu abordar cuestións relevantes para optimizar a xestión dos servizos ante os desafíos derivados do quecemento global.
Na xuntanza, os responsables portuarios salientaron o papel de referencia que ocupa o Porto de Marín grazas á posta en marcha, dende 2013, dunha serie de proxectos ambientais orientados á retirada selectiva de residuos procedentes das actividades pesqueiras e industriais.
Moitas destas iniciativas foron pioneiras en Galicia e contribúen a mellorar a eficiencia e sustentabilidade das operacións portuarias.
Actualmente, a Autoridade Portuaria de Marín valoriza o 84% dos residuos xerados polas actividades produtivas nas súas instalacións, cun especial protagonismo do sector de procesado de produtos pesqueiros.
Desde a Xunta entenden que estes resultados son proba do traballo desenvolvido ao longo da última década para avanzar cara a un porto máis sostible.
Ángeles Vázquez comprometeuse a analizar as fórmulas de colaboración e participación da Xunta nas iniciativas ambientais en marcha, co obxectivo de apoiar a optimización sostible das instalacións e contribuír á protección da ría de Pontevedra fronte ao impacto ambiental.