O PSdeG-PSOE e o BNG de Poio denuncian a falta de garantías legais e de seguridade nos actos do Entroido

Os grupos municipais do PSdeG-PSOE e do BNG en Poio anunciaron que non participarán no xurado do Entroido 2026 ante a "gravísima falta de garantías administrativas e de seguridade detectadas".

A decisión foi comunicada polos seus portavoces municipais, Gregorio Agís e Marga Caldas, tras acudir á hora fixada para a constitución do xurado.

Segundo explican, solicitaron que se lles acreditasen os permisos preceptivos, as autorizacións administrativas correspondentes e o dispositivo de seguridade previsto para a proba.

De acordo co manifestado por ambas formacións, a documentación facilitada "non acredita a existencia dos permisos necesarios".

Engaden que tampouco se constatou a presenza de autoridade competente, nin Policía Local nin Garda Civil, que asumise a supervisión do evento no momento da constitución do xurado.

Os dous grupos cualifican de "inaceptable" a celebración dun evento público sen garantir previamente o cumprimento estrito da legalidade.

Sinalan que ningún representante público responsable pode participar nin avalar unha actividade na que non consten as autorizacións necesarias "nin as condicións mínimas de seguridade", advertindo de que iso podería implicar riscos para as persoas participantes e para a propia organización.

Engaden que, de producirse algún incidente, podería existir incluso o risco de que as pólizas de seguro non respondesen.

PSdeG-PSOE e BNG aseguran que adoptan esta decisión tras denunciar que, nos dous últimos anos, se viñeron celebrando eventos sen as autorizacións pertinentes.

"A improvisación non pode substituír á xestión rigorosa nin o respecto á normativa vixente", sosteñen.

Ambas formacións esixen ao goberno municipal que actúe "con seriedade", que cumpra a normativa e que evite expoñer ao concello a situacións que, ao seu xuízo, comprometen a seguridade das persoas e a responsabilidade institucional.

Finalmente, os grupos quixeron agradecer o traballo das comparsas, dos grupos participantes e de todas as persoas implicadas na organización do Entroido, así como a colaboración da Protección Civil.