O Grupo Municipal Socialista presentará no próximo pleno municipal unha proposta para transformar a Casa Azul, o edificio municipal da rúa Sor Lucía, e crear unha Casa das Asociacións moderna e funcional.
A iniciativa persegue solucionar a grave carencia de espazos axeitados que sofren os colectivos sociocomunitarios da cidade e poñer en valor un inmoble público que se atopa en mal estado de conservación.
O concelleiro Marcos Rey explicou este martes que o proxecto pasa por unha "reforma integral" do edificio, co fin de adaptalo ás necesidades reais do tecido asociativo, xa que actualmente presenta problemas de humidades e de conexión a internet, entre outras.
A idea é crear un espazo compartido dotado de salas de reunións, zonas de traballo, conexión a internet fiable e equipamento básico, ademais de apoio técnico. "Pontevedra conta cun tecido asociativo vivo e diverso, pero moitas destas entidades carecen dun espazo físico axeitado, o que limita a súa capacidade", sinalou Rey.
Os socialistas consideran que, dada a elevada demanda, a rehabilitación da Casa Azul quedaría pequena. Por este motivo, a proposta inclúe tamén que o goberno local inicie "a busca de novos inmobles" que poidan sumarse a esta rede de espazos para asociacións. "A reforma da Casa Azul é un primeiro paso, pero é necesario ampliar a oferta", afirmou o concelleiro.
Rey recordou que a Casa Azul foi adquirida polo Concello en 1997 coa intención inicial de ser un centro de acollida para mulleres vítimas de violencia machista.
Desde entón, o edificio converteuse nun "pupurrí" de usos, albergando ata 19 entidades diferentes nunhas instalacións que "carece de sistema de climatización porque as temperaturas en inverno son frías e andan con radiadores de aceite e no verán teñen que usar ventiladores de man porque vai moita calor", denuncia Marcos Rey.
O modelo de xestión para a futura Casa das Asociacións definiríase nun proceso participativo cos propios colectivos, estudándose fórmulas de coxestión que garantisen transparencia e eficiencia.
En canto á financiación da reforma, o portavoz municipal do PSOE, Iván Puentes, indicou que aínda non se ten un cálculo económico, mais avanzou que será unha das prioridades que tratarán nas negociacións dos orzamentos municipais e que se explorará a opción de acceder a fondos europeos.
Os socialistas queren recuperar unha promesa xa incluída no programa de goberno do anterior mandato cando formaban parte do goberno local e que, segundo eles, o actual executivo (BNG), segundo denuncian, "parece ter esquecido".