Nesta nova entrega de "A cociña gourmet en conserva" coa calidade de sempre de Conservas Pescamar, imos elaborar unha receita tradicional de México, as quesadillas, onde gozaremos do exquisito sabor e delicada textura das luras ao allo Pescamar.
A lura destaca polo seu alto contido en proteínas de gran valor biolóxico; ademais do seu achegue en Omega-3, en minerais como o selenio, o fósforo, o iodo e o ferro, e en vitamina B12.
A quesadilla é un prato típico da cociña mexicana que consiste nunha tortilla ou torta fina de millo ou trigo dobrada pola metade en forma de media lúa, rechea de queixo e outros ingredientes ao gusto.
Para preparar unhas deliciosas Quesadillas con luras ao allo Pescamar usaremos os seguintes ingredientes:
- 8 tortillas de trigo ou millo
- 2 latas de Luras ao allo Pescamar
- 1 pemento verde
- 1 cebola
- 1 tomate maduro
- 200 g de queixo para fundir en lonchas
- aceite de oliva virxe extra
- cilantro
- sal e pementa
Preparación:
Picamos en xuliana fina o pemento e a cebola, e o tomate en dados pequenos. Nunha tixola, engadimos unha culler de aceite de oliva e sofreímos a cebola e o pemento ata que estean tenros. Incorporamos o tomate e cociñamos uns minutos máis ata que se integren ben os sabores.
Engadimos as Luras ao allo Pescamar co seu mollo e mesturamos suavemente. Rectificamos de sal e pementa se é necesario e espallamos un pouco de cilantro picado. Retiramos do lume e reservamos.
Nunha tixola ou nun ferro, quentamos unha tortilla por ambos os dous lados. A continuación, colocamos parte da mestura nunha metade da tortilla e cubrimos cunha loncha de queixo. Dobramos a tortilla formando unha media lúa e cociñamos a lume medio-baixo ata que o queixo se funda. Douramos por ambos os lados. Repetimos o proceso co resto das tortillas.
A medida que retiramos as quesadillas da tixola, colocámolas nun recipiente e cubrímolas cun pano para manter a calor.
Podemos servir no mesmo recipiente ou ben reservar as quesadillas unha vez dobradas e quentalas ata que se douren e o queixo quede fundido xusto antes de servir.
En quince días, os produtos do mar serán de novo protagonistas dunha nova receita de "A cociña gourmet en conserva" de Conservas Pescamar.