Chega unha nova entrega da serie "A cociña gourmet en conserva", da man de Conservas Pescamar. Nesta ocasión, imos preparar unha receita que nos trae os sabores de Francia e coa que aproveitaremos todos os beneficios dun dos peixes máis exquisitos e demandados: a cabala do Sur.
A cabala ou xarda é un dos peixes azuis máis valorados polo seu exquisito sabor e a súa achega en proteínas de alto valor biolóxico e ácidos graxos Omega 3.
O ‘tian’ é un prato tradicional da rexión francesa da Provenza, feito con verduras de verán asadas en capas finas. 'Tian' denominaba en occitano a fonte de barro onde tradicionalmente se preparaba, e acabou por dar nome a esta receita.
Para preparar un saboroso ‘Tian’ provenzal con Cabala en tomate Pescamar precisas os seguintes ingredientes:
- 2 latas de Filetes de cabala do Sur en tomate Pescamar
- 1 cabaciño
- 1 berenxena
- 2 tomates
- Aceite de oliva virxe extra
- Sal
- Herbas provenzais secas (romeu, ourego, albáfega, tomiño...)
Para a salsa de tomate:
- 1 cullerada de aceite de oliva virxe extra
- 1 cebola mediana
- 1 dente de allo
- 2 tomates maduros
- 1 pemento vermello
- Orégano
- Sal
- Pementa negra
Preparación da salsa de tomate:
Poñemos o aceite de oliva a quentar nunha tixola. A lume medio, cociñamos a cebola picada. Cando comece a abrandar, incorporamos o dente de allo ben picado e deixamos fritir dous minutos.
Mentres tanto, pelamos os tomates, retiramos a polpa e picámolos. Limpamos o pemento e cortámolo tamén en anacos pequenos. Engadímolos á tixola e deixamos que a mestura se cociñe a lume baixo durante 25 minutos. Remexemos suavemente ata que se forme unha salsa espesa. Rectificamos de sal e engadimos o orégano e a pementa negra. Reservamos a salsa.
Preparación do ‘tian’:
Poñemos o forno a prequentar a 180 graos.
Lavamos e secamos o cabaciño, a berenxena e os dous tomates. Cortámolos en rodas finas e de tamaño semellante, aproximadamente medio centímetro.
Nunha fonte redonda de forno botamos a salsa de tomate e estendémola ata formar unha base. Espallamos por riba o contido das dúas latas de Filetes de cabala do Sur en tomate Pescamar. A seguir, colocamos as rodas das verduras formando unha espiral, comezando desde fóra e rematando no centro, alternando entre elas.
Por riba das verduras, engadimos sal ao gusto, esparexemos as herbas provenzais e un chisco de aceite de oliva virxe extra.
Tapamos a fonte con papel de aluminio para que as verduras queden tenras pero non se queimen. Poñemos a fonte no forno a media altura e deixamos cocer 60 minutos a 180 graos.
Pasado este tempo, retiramos o papel de aluminio e poñémola de novo no forno durante uns 20 minutos ata que as verduras estean douradas.
Servimos o ‘tian’ na mesma fonte.
En dúas semanas volveremos cunha nova proposta de "A cociña gourmet en conserva" cos produtos do mar de alta calidade de Conservas Pescamar.