Chega unha nova entrega da serie "A cociña gourmet en conserva", da man de Conservas Pescamar. Nesta ocasión, imos preparar unha receita diferente, perfecta para compartir, na que as luras se transforman nuns deliciosos nuggets, con todo o sabor do mar e un toque crocante.
A lura destaca polo seu alto contido en proteínas de grande valor biolóxico, ácidos graxos poliinsaturados Omega-3, minerais esenciais como selenio, fósforo, iodo e ferro, e unha achega significativa de vitamina B12.
Para preparar estes deliciosos Nuggets de luras en salsa americana Pescamar para catro comensais necesitamos os seguintes ingredientes:
- 2 latas de Luras en salsa americana Pescamar.
- 2 patacas medianas cocidas
- 1 ovo
- 1 cullerada de perexil fresco picado
- 1 dente de allo
- 1 cunca de pan relado de gran groso (ou panko)
- Sal e pementa
- Aceite de oliva para fritir
Para a salsa de acompañamento:
- Salsa americana das dúas latas de luras Pescamar
- 1 cullerada de mel
- 1 culleradiña de mostaza de Dijon
- Unhas pingas de zume de lima
Preparación:
Escorremos as dúas latas de Luras en salsa americana Pescamar. Reservamos a salsa e cortamos as luras en anacos pequenos.
Nun bol, esmagamos as patacas cocidas e mesturámolas coas luras, o allo picado, o perexil e o ovo. Salpementamos ao gusto e traballamos a masa ata obter unha mestura homoxénea.
Formamos pequenas porcións coa axuda dunha culler e dámoslles forma redondeada ou de nugget. Pasámolas por pan relado e fritímolas en aceite de oliva quente ata que estean douradas por ambos lados. Colocámolas sobre papel absorbente para eliminar o exceso de aceite.
Para o acompañamento, mesturamos a salsa americana reservada co mel, a mostaza e unhas pingas de lima, batendo ata conseguir unha textura cremosa.
Servimos os nuggets acompañados dun cunco coa salsa e decorados con perexil.
En dúas semanas, os produtos do mar serán de novo protagonistas dunha nova receita de "A cociña gourmet en conserva" de Conservas Pescamar.