COGAMI, a Confederación Galega de Persoas con Discapacidade, iniciou en Pontevedra un curso que se desenvolverá ao longo deste mes de novembro para formar en Auxiliar de Servizos a persoas con discapacidade ou con incapacidade laboral para profesión habitual recoñecida.
Quince persoas participan neste curso de formación que funciona a través dunha modalidade mixta. Nove participantes acoden presencialmente e seis seguen as clases a través dun sistema telemático, como medida para facer fronte á covid-19
Trátase de alumnado procedente dos concellos de Pontevedra, Sanxenxo, Moaña, Ribadumia, Poio e Marín. Os participantes contan con idades comprendidas entre os 29 e os 60 anos e formaranse durante 75 horas lectivas en cuestións como a atención ao cliente, a recepción de chamadas ou os servizos auxiliares. Tras este curso poderán asistir a un seminario complementario sobre procura de emprego.
Este proxecto inclúese nun programa de inserción laboral Máis Emprego, financiado polo Fondo Social Europeo e a Obra Social la Caixa co obxectivo de que estas persoas poidan integrarse no mercado laboral.